作為電視節目「主持人」，最緊要壓得住場，尤其遇到牙尖嘴利或者百厭的嘉賓，絕不能有半點鬆懈，否則隨時被反客為主，顏面何存？天不怕地不怕的曾志偉，與氣吞天下的吳君如，去年先後以嘉賓身份，互上對方節目，「以彼之道，還施彼身」，各不相讓。但提到今年角逐「最佳節目主持」獎項時，志偉和君如竟突然變得異常禮讓，非常詭異！

想捧錢嘉樂攞獎

首次角逐此獎項的君如說：「第一次角逐，心情意外又驚喜，冇諗過自己可以向電視節目主持方面發展。離開TVB廿幾年，返嚟就做到一個咁成功嘅節目，要多謝監製、編導、拍檔（錢嘉樂）同嘉賓。要做一個好睇嘅清談節目，好拍檔同投入嘅嘉賓缺一不可。」被睇好可贏志偉奪獎的她笑說：「曾志偉嘅主持風格可謂前無古人，後無來者！喺佢呢種級數面前，我只係『初級生』，點敢講咩輸贏呀？」

君如笠高帽，志偉卻連消帶打：「君如呢啲就係『高級生』年齡，入嚟做『初級生』嘅嘢！我睇好君如攞獎，佢主持做得好好，呢類節目要個主持人夠八卦先至好睇，所以話君如係高級生嚟嘅！（你有冇信心攞獎？）平常心啦！我哋《獎門人》都喺時候退位讓賢。其實我捧君如都係想錢嘉樂攞獎，同佢合作《獎門人》咁多年，睇到佢有進步，我希望《星星同學會》攞獎！」

兩大陣營似鬥非鬥，無論是志偉還是君如勝出，錢嘉樂都是得獎者，他說：「做咗《獎門人》咁多年，贏到梗開心。但《星星同學會》係今年新節目，同君如第一次以呢種形式合作，如果得獎就會更興奮。」與君如合作最難忘是能當眾窒她，嘉樂說：「君如出名辣，如果唔夾都幾辛苦，好在佢肯畀我大庭廣眾喺節目度窒佢，加上嘉賓肯講心事，令我有好大滿足感。」