台慶劇《宮心計》演員昨晚拉大隊現身荃灣愉景新城，出席特別安排的《贏盡滿城宮心計》，與800位入場觀眾及2,000多名圍觀市民欣賞大結局，實行宮中上下與民同樂！晚會由「阮司設」關菊英唱主題曲打頭陣，「劉三好」佘詩曼亦有獻唱插曲，連「糖蓮子」小烏龜亦出場助興。問到監製梅小青會否開拍續集？她說：「《公主嫁到》係喜劇版，亦可算係續集，大部分演員都有份參與。」

TVB高層曾勵珍與彭濟材昨晚亦現身撐場，提到收視期望，珍姐即興奮地說：「梗係收視爆燈啦！」身旁的佘詩曼亦插嘴望衝破50點！戲中大奸角「麗妃」楊怡亦異口同聲地說：「梗係收視過50點，勁過《大長今》！播完呢個劇終於有餐安樂茶飯，為咗睇電視搞到食唔安、瞓唔樂，遲啲會約埋佘詩曼同鄭嘉穎食番餐好嘅。」她又笑言可以再做好人：「因為『姚金鈴』做太多衰嘢，但報應報喺現實生活嘅我身上！最近好多狗仔隊追我，搞到我神經衰弱，面對追訪我真係好渣，唔識應付。」楊怡自爆前晚遭狗仔隊追訪，錯走窮巷跑入垃圾站，她愈講愈激動：「我入到垃圾站內面對四面牆，走投無路，好慘！呢個角色太衰，我好似過街老鼠、神憎鬼厭。」但她仍識講笑：「我冇拖拍，咁大個女都未試過畀咁多男人追！」

麗妃刺殺馬大將軍後，欲毒害三好失敗，落得發瘋收場。	放大圖片	三好最後離宮，攜女上街時遇見失憶的高顯揚，但未有再交代去向。

無緣演出續集

提到續集《公主嫁到》，楊怡透露因同時另開新劇而未能參演：「唔可惜！幾時都可以合作！」出爐金馬最佳女配角惠英紅帶同獎座到場派旺氣，楊怡笑說：「我直情將小紅姐抱在懷中，充滿旺氣！」而「劉三好」佘詩曼則恭喜小紅姐，還學楊怡擁抱沾旺氣，她笑說：「旺氣唔嫌多，之後我會同楊怡一齊請小紅姐食飯慶祝。」視后於本周五揭盅，相信屆時會知道兩人沾旺氣後會否如願贏視后！會上，當播到「馬大將軍」李國麟被楊怡刺殺時，全場拍掌。播畢後，楊怡受訪時已眼紅紅，自爆邊睇邊捉實阿佘，甚為激動。

關菊英打頭陣獻唱主題曲，以美妙歌聲冧觀眾。	佘詩曼與兩位小演員齊齊唱出插曲《風車》。	《宮心計》昨晚播出大結局，一班演員事前開香檳預祝收視破紀錄。