憑《宮心計》奸角姚金鈴而人氣急升的楊怡，昨日到尖沙咀英皇珠寶旗艦店，為下月出席《萬千星輝頒獎典禮》試戴三套總值逾一千五百萬港元的名貴首飾，準備為隨時榮升視后做足準備，她說：「我想揀啲靚同特別嘅出席頒獎禮，三套入面我鍾意紅寶嗰套多啲。（唔着埋戰衣試？）唔得！戰衣到時着，我可以想像得到個效果。（買首飾獎勵自己？）都好喎！唔知有冇折呢？又冇男仔送畀我，蝕呀！第時男仔向我求婚，我要一百卡鑽石，唔怕嚇走追求者，佢會買得起，女人貪心係啱㗎！」
阿媽敢怒不敢言
楊怡又自爆曾遺失戒指：「我試過洗手唔見戒指，又試過拍《家好月圓》，整唔見李司棋借我嘅戒指，慌到我喊，司棋姐好淡定，我驚整唔見佢啲嘢，好在後尾喺衫袋搵番，所以我決定頒獎禮嗰晚唔去洗手間㗎喇！（點睇有雜誌將《宮》劇結局登晒出嚟？）都係時候煲起個劇，呢輪出街好多人向我求證劇情，我唔會答，要保持神秘，多人關心都開心嘅。有時見到媽咪睇《宮》劇，睇見我就忟憎，知佢好想鬧我，但又唔可以，感覺幾得意。」
至於憑《巾幗梟雄》四奶奶贏盡口碑的雯女，前日為「樂敦養潤水」拍廣告，她謙稱：「我自評對眼最靚，好開心有人賞識搵我拍護眼液廣告，細個覺得戴眼鏡好型，特登走到好埋睇電視，博有近視，大個至知咁好傻！（頒獎禮有咩鬥靚殺着？）我依家要同人鬥靚、鬥後生，係冇得鬥㗎喇！我會培養我嘅內在美嚟轉移視線。」另外，英皇鐘錶珠寶將分別於下月三日至七日在尖沙咀廣東道八號店、十日至十五日在銅鑼灣羅素街五十號店，舉行兩場「百達翡麗展覽」，將展出六十九隻總值逾二千萬的名貴手錶，屆時楊受成、英皇鐘錶珠寶董事總經理楊諾思及多位財經界名人均會出席。
正邪之戰贏面55波
正 派
06年視后佘詩曼絕招：靈活百變
佘詩曼在《鳳凰四重奏》中，一人分飾四角，穿越四個不同時代，百變戲路給人無限新鮮感。
07年視后李司棋絕招：熱爆金句
李司棋憑《溏心風暴》的大契一角贏盡民心，其悽慘角色及發人深省的金句，獲得全民熱捧。
反 派
05年視后汪明荃絕招：野蠻大晒
汪明荃在《我的野蠻奶奶》中發揮阿姐本色飾演野蠻奶奶，用生鬼手法演活奸角。
08年視后米雪絕招：不擇手段
米雪在《溏心風暴之家好月圓》中飾演紅姨，為執餅店大權，使盡陰險招數，成功奸上位。
過去四屆的視后爭奪戰都由正反派平分秋色，今年雯女的「四奶奶」及楊怡的「金鈴」同樣是一忠一奸，勢均力敵！