熊黛林、鄭嘉穎與Angelababy昨日為周大福企業集團新商場「活力」剪綵，問到有否與陳偉霆慶祝生日，Baby冷淡地說：「好耐冇見，呢兩個月都喺日本同內地做嘢，就算喺香港都要開工。（打電話畀佢？）冇時間，但生日有SMS佢。（暫時分開？）我哋一直保持朋友關係。（因工作而犧牲感情？）都係，成日唔喺香港，感情順其自然。」她透露聖誕節將在日本單獨度過，問到是否想與男友過，她說：「如果我有，我都想。（可能佢會畀驚喜你？）應該唔會。（叫佢飛過去探你？）唔好，費事畀人誤會。」
至於熊黛林則表示一定會欣賞郭富城的新片《風雲II》：「第一集都有睇。（10年前已經迷上城城？）唔係因為電影，佢之前出碟已經聽過。（10年後一齊好意外？）都幾意外，亦意外自己會喺香港。（同佢一齊睇？）唔會，一齊去睇就唔係睇戲，係啲人睇我哋。」