下月4日將舉行《萬千星輝頒獎禮》，楊怡、佘詩曼、陳豪及黎耀祥等正磨拳擦掌為爭獎拉票，不過爭獎背後卻密密吸金，在《宮心計》和《巾幗梟雄》效應下，不但人氣急升，荷包更豬籠入水，認真係未攞獎先攞「獎金」！雖然在暑假期間，不少藝人被o靚模搶接商場騷令收入大減，但o靚模熱隨冬天來到即降溫，加上頒獎禮舉行在即，幾位視帝視后熱門乘勢吸金，難怪楊怡及阿佘分別出席活動搵真銀時，均笑到見牙唔見眼。
笑言人望高處
楊怡昨日以嘉賓身份出席龐蓓分店開幕禮，雖然早前因到日本拍劇，阻礙吸金大計，但《宮》劇將於周日大結局，楊怡見報率亦大增，問到近期是否多了搵錢機會？楊怡笑晒說：「我都係託『金鈴』鴻福，依家真係多咗好多工作，但因為仲拍緊劇，所以要同監製度期，希望可以畀到時間我接Job，接咗啲聖誕騷喇！」問到會否在店內攞Sponsor？她笑騎騎說：「梗係攞！依家攞得就攞，我貫徹『攞女』作風，不過係金鈴性格，攞幾多我唔理喇！」問到大豐收會否換樓？她大口氣地說：「換樓不如買多層，人應該向上望，有機會就買多層，不過可能年底只可以買到間屋畀我隻狗！」
另一邊廂，阿佘近期亦密密接騷，藉聖誕來臨又出席亮燈活動，她昨日穿上露背裝出席積家腕錶活動，獲大會贈送一隻價值40萬港元的限量腕錶，難怪她隆重其事以全身行頭總值400萬元出席活動。阿佘直言因為《宮》劇效應賺多了外快，問到有否賺逾7位數？她說：「都差唔多！」她更為自己賣廣告，自言隨和，甚麼活動也通殺！
嘉穎氣勢墮後
黎耀祥和陳豪兩位視帝大熱吸金也絕不手軟，祥仔近月曝光率倍增，吸納廣告商招徠，保守估計近期接拍六個廣告，淨袋7位數。而昨日與楊怡出席活動的陳豪，除了出席《宮》劇宣傳活動外，亦頻頻接騷，單以月初與Jessica C.出席護膚品牌活動計算，酬金近十萬元，認真吸金快過打針！至於同是《宮》劇的鄭嘉穎雖有份爭視帝，可惜聲勢稍弱，有指他被「伯樂」樂易玲打入冷宮，昨日他與熊黛林及Angelababy齊齊出席活動，但風頭被兩女搶盡。