日前香港持續低溫，靚女們紛紛穿起大褸，其中蔡卓妍（阿Sa）及吳雨霏（Kary）着得有型。
阿Sa盡顯青春（8分）
今季興皮褸款，阿Sa揀咗件藍色效果好出，入面襯件普通Tee同牛仔褲，簡單嘅配搭畀人一種簡約時尚嘅感覺，着得青春又有型！
Kary着出型味（8分）
Kary一向走型女路線，今次黑白配簡單得嚟又有星味。今季好興嘅闊筒褲好難着得好睇，但佢Carry得好， 好有潮流觸覺！
阿嬌黃色搶眼（7分）
呢件好搶眼嘅黃色衫，顯得佢好青春、好時尚，件褸同飾物襯得靚，不過對手襪略嫌Over，如果個妝淡啲，放啲頭髮落嚟會仲好。
諸葛梓岐師奶味濃（6分）
呢個少婦Look着得佢好老，紅色手袋唔襯，條Belt又格格不入，半透明嘅波點絲襪更不倫不類，佢可以襯條窄牛仔褲配高踭鞋。
傅穎東瀛潮妹（7分）
金髮襯黑色外套效果好Sharp，最特別係個袖反出嚟見到黑色波點，好有日本味，好啱佢嘅Kawaii「瀛」妹路線，睇落舒服！
賈曉晨衣着老土（4分）
本身條黃色裙太斯文，加埋件白色毛毛褸就更娘，着到個人好老，其實佢本身個樣好靚，外形唔錯，但着衫就偏向老積。
陳法蓉襯得臃腫（3分）
今季興闊膊褸，但陳法蓉襯得好差，入面條裙唔收腰，着到成個水桶咁，感覺好師奶，如果着件窄身衫會有收身效果。
Profile
入行已久的Ricky（郭慶彬），主力從事廣告形象指導，樂基兒及熊黛林都曾獲他執靚形象，又為欣宜及張可頤等任形象設計，並於銅鑼灣設店，專售英國及日本時裝。