飲食題

問：試過用咩方法減肥？最嚴重減到咩程度？

答：做運動，會打籃球同跑步，試過兩星期減咗15磅，每日食兩餐，同埋每日做3至4個鐘運動。

問：有咩古怪嘅飲食習慣？

答：絕對唔會一個人食飯，如果冇人陪，得一個人，我寧願唔食！

解說：好多人以為做Model一定乜都唔食，但我就唔係，一肚餓就要食嘢，而且最鍾意食薯片同麵包，食得是福嘛！

生活習慣題

問：有冇試過因為攰而唔沖涼瞓覺？嗰次係點？

答：攰同凍都試過，基本上天氣太凍就唔會沖涼。

問：會唔會攬住公仔先瞓得着？

答：唔會，唔鍾意攬公仔，但鍾意攬住張被。

問：鍾意着便服、公仔睡衣定性感睡衣瞓覺？

答：鍾意着T恤同波褲瞓覺，一定要超大碼。

問：一個人喺屋企嘅時候，會唔會唔戴Bra通屋走？

答：會，通常一返到屋企就除Bra，覺得冇嘢勒住舒服啲。

解說：我一返到屋企，就會除隱形眼鏡同Bra，覺得除咗呢兩樣嘢就冇晒束縛，好舒服！而且我每晚一定敷唔同嘅Mask，始終做呢行皮膚好緊要，但我唔係為貪靚，而係為工作多啲！

莊思敏熱愛運動，所以放心進食亦不怕發福。

放大圖片

個人喜好題

問：底褲鍾意淨色、卡通、喱士、豹紋定花花圖案？

答：豹紋同Colorful，唔鍾意卡通。

問：去旅行鍾意跟團定個人遊？

答：個人遊，去旅行最緊要舒服，唔想跟團咁早起身。

問：幾耐去一次旅行？

答：一般半年至9個月，但去旅行唔係必須，可以幾年唔去都得。

問：同朋友出街，鍾意大班人約會，定係單對單兩個傾密偈？

答：鍾意兩個人多啲，基本上唔係太鍾意一班人，因為多人好難夾；但去旅行就鍾意4個人，因為搭的士方便，又唔怕兩個人會悶。

解說：我個人可以好多嘢講，但偏偏唔鍾意一大班人一齊，有啲人鍾意成大班人去呢度去嗰度，我就一定唔會，就算去旅行都係揀2、3個志同道合嘅朋友先會去，所以我喺呢行唔算有好多朋友。