曾是《畢》劇一分子的江欣燕，昨晨返電視城錄影其他節目，再到錄影廠慰問同事，她還摸着陳鴻烈出事時坐過的櫈懷念：「今日個廠氣氛愁雲慘霧，個個都忍痛開工，其實做演員呢行，出咗名係死頂，成日都會唔顧健康，自己試過白內障，成年時間睇嘢都矇查查，結果捱咗成年先去做手術，今次烈哥呢件事，對圈中人係一個警號，大家要關心健康，不過心臟病又好難預防，我伯父都係心臟病死，爸爸仲通過『波仔』。」
另外，黎耀祥昨日為《畢》劇開廠，他坦言因事發突然，開工情緒亦受影響，更透露毛舜筠忍不住喊，其後他接受查小欣電台訪問時，指烈哥平時着衫好隨便，但對戲服卻一絲不苟，非常專業。而黃子雄表示入廠後見到烈哥坐開的大班椅，感覺他還在：「佢份人好開心、鍾意玩，可能依家喺度玩緊，大家應該跟番佢樂觀嘅做人態度。」同樣有份拍《畢》劇謝雪心昨日出席記者會時說：「我喺20號嗰日，仲同陳鴻烈拍《畢打》，冇諗過咁樣，今朝開工個個都心情沉重，我哋惟有互相捉住手安慰，其實陳鴻烈好有演員操守，台慶綵排實早到，當時戴住貓王頭套，我見佢好開心，唔捨得除o架！」