陳鴻烈縱橫藝壇四十載，貢獻良多，據知無綫將在下月四日舉行的《萬千星輝頒獎典禮》中加插表揚陳鴻烈的環節，不少網民認為陳鴻烈對無綫有貢獻，應獲表揚，而無綫方面昨日說：「多謝觀眾對烈哥嘅支持，無綫會審慎考慮，作出適當安排。」據知，無綫正研究是否向陳鴻烈追頒獎項，但由於他並非今屆「萬千星輝演藝大獎」的候選人，故獲頒此獎機會不大。
閆器心臟病離世
原定明年一月才播出大結局的劇集《畢打自己人》，劇情原本打算安排陳鴻烈飾演的閆（音：閰）器，因愛女心切，甘願替因公事而犯法的女兒郭少芸頂罪，結果以花甲之年鋃鐺入獄，最終能刑滿出獄，返家重享天倫。不過，由於陳鴻烈突然離世，令上述劇情大受影響，《畢》劇經緊急會議後，決定作出應變。《畢》劇監製羅鎮岳昨日說：「烈哥已經拍咗嘅存貨仲有十集，加埋其他集數，大約可以播多一個月，TVB決定安排烈哥飾演嘅閆器喺劇中突然心臟病離世，閆器病發嘅場面唔會有，只會由劇中其他演員用對白交代。（要演員再次面對陳鴻烈死亡，做法會太殘忍？）我相信TVB演員都係專業嘅，喺工作上會處理得好成熟，編劇要寫呢段戲都難受，其實大家都難受，但呢個安排對各方面影響都唔會太大。（為烈哥拜神做法事？）唔會！今次係意外、病痛，唔係車禍，唔想令大家更加不安，所以唔打算做法事。」
至於陳鴻烈遺孀徐世榮、一對子女及陳的妹妹，昨午約二時三十分現身將軍澳醫院，到殮房進行認屍手續，四人均戴上口罩，未有回應記者提問，陳的妹妹說：「問乜都唔答，影夠唔該讓一讓。」
遺孀往故居致祭
四人離開殮房時，刻意選擇其他通道，成功避開現場傳媒。徐世榮等一行四人約下午四時，乘的士返抵油麻地永星里陳鴻烈生前寓所，四人上樓前曾到上海街多間售賣紙紮祭品的舖頭，徐世榮神情哀傷，但對為亡夫選購祭品一事仍一絲不苟。
無綫製作資源總監樂易玲昨日說：「同陳太聯絡過，問有冇嘢要幫手，但佢都仲未定神。（知唔知陳鴻烈經濟有冇困難？）方逸華小姐都好緊張呢件事，問藝員部經濟上有冇嘢可以幫到手，但陳太都係冇提出要求，其實烈哥出道以來都好積極工作，經濟應該唔太差。（對藝員進行心理輔導？）包括我在內，依家都仲好難過，其實烈哥當日接受急救嘅畫面，好多藝員都仲歷歷在目，到依家都仲未釋懷。」
而陳鴻烈生前一位陳姓好友昨日向記者透露：「阿嫂喺台灣接到噩耗，好傷心絕望，都有討論過想將烈哥遺體接返台灣，但認屍後好傷心，已經冇再傾呢件事。（喪禮儀式、殯儀館決定咗未？）依家仲有好多文件要搞，阿嫂心情好差，仲未決定。」
另外，無綫製作部總監（非戲劇製作）何麗全昨日慨嘆：「烈哥之前喺台慶表演好受歡迎，本來諗住搵佢喺《歡樂滿東華》表演，但依家已經冇機會。」而無綫官方網站亦開設專區供網友悼念陳鴻烈。