鄭希怡於3年前演出《歡樂滿東華》的「空中飛人」時失手甩褲，當年間接令她甩褲的嘉樂曾揚言，若Yumiko「嫁唔出」，必定義不容辭做其男朋友。事隔3年再度合作的他們，昨日偕同梅小惠、曾華倩及無綫高層何麗全等，出席《歡樂滿東華》記者會，而他們今年將表演《飄移打保齡》。新一代「東華台柱」Yumiko，被華倩及小惠取笑是「錢太」，而何麗全亦叮囑她表演要小心，場面惹笑！

再合作有陰影

對於被封為「錢太」，Yumiko笑說：「我係大婆，同『散餐』唔同！」似乎暗示嘉樂的女伴多如散餐，嘉樂即反擊：「你係常餐！（成日食散餐？）唔係！我成日食常餐，好健康o架！」他隨即扯開話題說：「好開心再同Yumiko合作，今次有啲難度！」問到再與Yumiko合作有否陰影？他說：「冇陰影……就假！其實Yumiko好豁達，我又慷慨，上年我喺幕後支持佢演出！」Yumiko續說：「係呀！佢上年喺幕後教路！」嘉樂即笑說：「當係一個補償！」他又笑言因今年沒有身體接觸，Yumiko才會演出。

講承諾即扮傻

問到會否對Yumiko許下「承諾」？嘉樂即詐傻說：「吓？今年承諾？籌多啲善款，忘記過去，看見將來！」而Yumiko亦不擔心會再度「失準」，嘉樂聞言即力撐「老婆」：「我就係鍾意佢咁夠膽，所以一諗起同車有關嘅演出，就即時諗起佢！」

對於舊愛李麗珍拍攝性感廣告，嘉樂表現激動：「吓！講埋啲咁嘅嘢！」Yumiko即笑窒：「乜又係你o架？」記者解釋二人曾拍拖，她再笑說：「我都未出世！」嘉樂則尷尬地說：「我都戥佢（李麗珍）開心，佢應該係咁靚嘅！」雖然嘉樂其貌不揚，但歷任女友均樣靚身材正，「錢女郎」索爆程度不亞於王晶的「晶女郎」。

此外，前晚嘉樂與賽車手吳海堂出席《錢家班多功能拍攝KL100發布會》，呂慧儀、吳浩康和吳家樂等畀面出席。嘉樂笑對緋聞女友湯盈盈在台慶當晚疑似被志偉胸襲，他表示自己玩遊戲有底線。