本文重點
盧惠光與黎淑賢離婚後，雖爭得兩子撫養權，但近年遭逢成龍公司遣散，人又冇錢又冇的他，成為「雙失窮爸爸」，日前被發現孤獨湊仔，冇錢去玩，只能帶愛兒到公園玩「零消費」的盪鞦韆。
這名「雙失窮爸爸」盧惠光（光仔），自從被成龍賞識後，二十多年來，一直是其左右手，無論大小事務，光仔都仆心仆命為大哥處理，但針冇兩頭利，光仔卻犧牲湊仔時間，兩名分別得十歲和四歲的兒子，在整個成長過程，只佔得三分之一的父愛，尤幸大仔Jacky和細仔Jovan很生性，沒有半句怨言。
日前，記者發現光仔「一支公」湊仔，他身兼母職前往接大仔Jacky放學，只見光仔當時十分狼狽，手抱細仔Jovan兼孭書包。小朋友始終愛玩愛食，當Jacky路過日本餐廳時，又手指指嚷着要食壽司，可憐「窮爸爸」光仔自從被遣散後，生計已成問題，要知道撫養一個孩子要四百萬，他覺得要做一位負責任的父親，就應該「慳住使」，所以經過日本餐廳時，都過門不入，Jacky只能眼光光有得睇冇得食。
嘆遣散費少
外間一直以為光仔收到一筆可觀遣散費，從此生活無憂，但據知遣散費只得十萬八萬，已達五十歲的光仔，突然失去靠山，工作無定向又要撫養兩名兒子，難怪要節衣縮食，冇錢去「冒險樂園」玩，只好帶兩名愛兒到公園玩「零消費」的盪鞦韆。
目前未有新工作的光仔，只靠做散工度日，記者向他了解遣散費問題，他支吾以對，不想多講數目是否得十萬、八萬：「總之就唔多啦！我依家生活艱難，忙住搵錢湊仔，無謂開支當然要慳，仲話食日本嘢，我自己做演員靠外表搵食，近兩年都冇錢裝身。（覺得心淡？）我唔講啦……我寧願實際啲去搵錢，唔係點養仔呀？」