小小So可以講話睇住關心妍成長，見佢嫁咗個好老公楊長智都好安慰，早排佢仲SMS畀小小So，話因為之前喺峇里舉行嘅婚禮人數有限，請唔到小小So見證佢嘅人生大事，深感歉意，所以佢誠意請番小小So出席佢喺香港搞嘅Party，仲同小小So合照留念同分享喜悅，當晚佢仲請到好多賓客出席添，認真架勢！
由於Jade高調大搞婚禮難免招人妒忌，早前有位有份去派對嘅賓客喺討論區留言，不留情面力數Jade嘅臭史，又話佢愛晒命、博見報同臭脾氣，掀起唔少網友互罵，有網友仲重提當年Jade被指投訴售貨員而累人被炒單嘢。小小So覺得有啲網友係惡意批評，做啲損人不利己嘅事，明白藝人食得鹹魚抵得渴，不過無需要承受不實報道嘅壓力，好彩Jade向來EQ高唔係好睇網友嘅留言，反而最在乎自己嘅個人網誌支持者嘅反應。