愛心爆棚的吳彥祖日前從四川參與慈善探訪返港，昨日聯同古天樂、蔡卓妍（阿Sa）及杜汶澤等出席英皇新片《鎗王之王》的宣傳活動，他透露此行曾落手落腳興建六層高的樓房，更被師傅大讚手工好，難怪他笑言日後冇戲拍亦可轉行當「泥水佬」。

今次他有幸與美國前總統卡達同場，令他興奮莫名：「佢今年86歲，好親切同活力充沛，仲指住Lisa，話要同佢合照添！（你呷醋？）又唔會，佢老婆都在場，況且當年佢當選，仲令到得六歲嘅我想效法佢，做美國第一位華人總統添！」

古天樂因拍戲愛上玩槍，更曾抽空到射擊場過手癮。

阿Sa雖然外表嬌滴滴，但玩槍時有板有眼。

花數千元玩槍

吳彥祖與古仔因拍劇要接受射擊訓練，昨日兩人展示開槍技術，古仔透露接受訓練期間試過花數千元試槍，又專程往澳門睇比賽：「雖然我好鍾意呢項運動，但發現世界級高手都係肥仔，我諗我要退咗休先得。」日前他被指斥資逾億元購入港島區六千多呎豪宅，但他坦言未作最後決定，即使成交亦只會自住。而阿Sa開工期間與古仔大談前途問題，獲對方為她分析：「佢教我點樣揀戲拍，又話睇好我日後有獎攞，成個導師咁！」

此外，憑《如夢》獲提名金馬影帝的吳彥祖，將出席於本周六舉行的《第46屆金馬獎》，據知大部分提名人均會畀面出席，包括《風聲》的周迅、《如》片的袁泉、《証人》的張家輝及《鬥牛》的黃渤等，有指李安及關錦鵬等導演亦赴會。