有傳謝安琪（Kay）自今年五月處女個唱中，被指和陳奕迅在台上合唱時相擁過電後，令二人的緋聞甚囂塵上，由於他們同是有家室之人，所以緋聞亦惹來一陣哄動。雙方更多番否認，Kay經常拖另一半晒恩愛，Eason亦堅稱與太太徐濠縈關係穩固，不過最近又有一張疑似Kay和疑似Eason的床上親密錫面照於網上流傳，令本已降溫的緋聞再次升溫。

謝安琪和陳奕迅因在演唱會上相擁共舞，隨即傳出緋聞。

Kay在前晚的音樂會上，與Mr.成員Dash跳舞Jam歌。

照Tip陳奕迅攞獎

昨午《2009四台聯頒音樂大獎》記者會上，大會安排去年「傳媒大獎」得主Kay預測今年心水，她毫不避嫌選Eason得獎。對於疑似Kay和疑似Eason的親密照被流傳，Kay坦言看到報道後很傷心：「我覺得今年由年頭到年底都不斷畀人攻擊，今次直情係侮辱。（相中人係你？）梗係唔係！（你覺得有幾成似？）零似！」她更怒斥：「似唔似都唔係重點，根本就唔係我，用張相就亂咁寫！」

問到會否覺得頒獎禮前有人搞事？Kay愈講愈激動：「我唔知乜人搞事，只係知有人作古仔詆毀我，全年都係咁，好多時都冇原因。其實要澄清已經澄清咗。（會唔會同老公解釋？）唔需要。其實報道前嗰個記者已經畀過啲相我睇，我都唔想睇，因為一定唔係我。（報道仲話你用忙做藉口唔返教會？）唔回應。（會追究事件？）交畀公司處理。」

負面新聞冇停過

Kay重申：「我唔鍾意不斷搞新聞，從來冇同任何人影過親密照片，希望咁壞嘅風氣快啲過去，我本身生活好健康！（同老公都唔會影？）同任何人都唔會影，冇呢個喜好同習慣，今年承受太多呢啲新聞，簡直係令我死去活來。」她透露監製還笑她今年的經歷眾多負面新聞，仍能像新歌《活著》，她說：「經歷咗咁多，心情就好似坐過山車，好難過。」問到她為何不避嫌預測Eason攞傳媒大獎，她說：「工作還工作，唔好混為一談。」