陳敏之並非當家花旦，但勝在形象入屋，只要看見她的樣子或41吋長腿，已能說出她的名字，可惜得到的讚賞往往不是「演得」，而是「條腿好長」，敏之現時欠缺的，可能是助她升呢上一線的頭銜！
要躋身一線花旦之列，敏之明白「飛躍進步女藝員」一獎十分重要，但外表自信的她，原來對獎項寄望不大：「我都唔記得第幾年提名呢個獎，信心只有一半半，我唔係有好多劇出，今年好似得一套《富貴門》好啲，但套劇仲播緊，未知自己分數有幾高，加上每個對手水準都好好，講真，我真係睇好陳茵媺多過自己！」
靜待代表作
攞獎當然要靠牙力，但敏之認為至今還未有一套代表作，令爭獎機會再低一截：「我知呢啲嘢唔可以控制，新劇《美麗高解像》就快出街，我飾演一個吸毒嘅明星，事前做足功課，睇多啲有關吸毒嘅戲，又令自己瘦啲，希望演得更似。呢個角色好有發揮，希望可以成功！」
多次失敗雖左右了敏之的信心，但她耐心等待「爆發」一刻，希望靠「奸角」出位：「做奸角突出啲，以前做親都係靚女、有錢女、斯文嘅角色，其實我絕對可以演奸角，《下一站彩虹》之後就冇做過，依家真係好期待，直情恨到流口水呀！」
百足咁多爪
「飛躍進步女藝員」獎不單着重演技，而敏之一直百足咁多爪：「我好鍾意做司儀，可以訓練應變同口才，對做戲有好大裨益。我好希望司儀同拍劇雙線發展，以前試過唱歌、拍電影、舞台劇、出書，做藝人唔可以做死一樣嘢！我唔係特別叻嘅人，咪睇我做司儀淡淡定，其實我係『騰雞英』，上台時手心冒汗，個個都唔信我驚，其實我只係台前、台後兩個樣。」
後記：誇得滯？
台慶頒獎禮在即，女藝人都想在當晚着到鬼火咁靚，鑽石有咁大粒得咁大粒，即使只是做專訪，敏之亦希望靚過鬼火，故特別佩戴價值逾7位數的鑽飾，還有大隻保安跟身！不過，受寵若驚的她卻說：「會唔會誇得滯？」從這句說話可見，敏之欠缺的其實是自信！
服裝：Sistyrmoon
珠寶：FOREVERMARK
髮型：Joe Tsui@Hair Culture
化妝：Raymond Yip