挾「港姐冠軍」之名走入公仔箱的陳茵媺（Aimee），以一對「警鐘胸」做Trademark，很多人以為她會成為新一代「咪神」，但她走的路卻南轅北轍！一套《烈火雄心3》加上做極唔完的《畢打自己人》，令她的男仔頭形象深入民心，不少網民力撐她成為今屆「飛躍進步女藝員」。
談及得獎機會，她信心十足：「我對自己好有信心，但都會以平常心對待，畢竟入行只有3年，拍劇只係拍咗兩年，有提名已經係好大鼓勵！」談及被陳敏之睇好攞獎，她反過來送上高帽，讚敏之才是最大勁敵：「我真係好喜歡佢，除咗演技，佢做司儀都好好，我都做過司儀，知道真係好難，佢拿捏得好好！」
惡補廣東話
在加拿大長大的Aimee，是一個不折不扣的「ABC」，要她像土生土長的香港人般說出「啲嘅呢」這些廣東話，確實難度很高：「《畢打自己人》係處境劇，講好廣東話係最基本，所以我逼自己每日都講廣東話，仲要識得睇。爹哋喺加拿大，我特登Email劇本畀佢，佢再用長途電話逐個字讀番畀我聽，一讀就幾個鐘，不過電話費當然由佢畀啦！」
演活辣椒仔
Aimee現已看懂9成劇本，又獲監製及導演給予機會，能否上位就要看其造化，但她捨棄較易出位的性感形象，選擇做一個男仔頭：「《烈火》係至今最具挑戰性嘅角色，性格同我完全相反，要我做一個好主動、粗魯嘅辣椒仔真係好難，好彩監製同其他演員都好照顧我，能夠被人欣賞，實在始料不及！」
後記：忙到爆
Aimee是一個極勤力的藝人，跟她約訪問足足等了1個月時間，每次致電給她，不是打不通，便是收到她的答覆：「真係冇時間呀！我都好想做好件事，再約啦！我一定覆你！」如是者一次復一次的對話，Aimee果然言出必行，親自來電說：「我有時間喇！不過得半個鐘，對唔住！」證明她真的很忙！