新一代舞王陳偉霆（William）及狄易達經常被外間比較，日前William更被轟黐大星、唱達仔跳舞水皮及背棄好兄弟張致恒（Steven）三宗罪，昨日他與達仔在記者會碰頭亦大方合照。提到三宗罪，William強調不是事實，自言甚懂人情世故，不會說令人誤會的話，他又主動澄清為何缺席Steven生日派對：「嗰日我拍緊戲去唔到，其實我好想去！」
而狄易達力撐William對其態度沒有改變：「我哋嘅假想敵係韓國、台灣同內地歌手，跳舞贏佢哋先叫進步！」並表示與William舞路不同，連笑容亦不一樣：「我笑容多啲，佢型啲！」
