樂壇天后祖兒、陳奕迅（Eason）、蔡卓妍（阿Sa）和樂隊Mr.等，昨日出席《新城勁爆頒獎禮2009》記者會，大會即場公布3個獎，祖兒奪「勁爆播放指數大獎—歌手」，Eason憑專輯《H3M》奪勁爆年度專輯大獎，而樂隊Mr.亦極速「升呢」憑歌曲《如果我是陳奕迅》奪「勁爆播放指數大獎—歌曲」。

Mr.、Eason及祖兒先拔頭籌奪獎。	泳兒、鍾舒漫（左一及二）、阿Sa、陳偉霆及洪杰等英皇歌手齊撐祖兒奪獎。	鍾舒漫（左）與官恩娜鬥舞，不小心「批」中對方胸部。

冇諗過「起雙飛」

祖兒上台時因裙襬太長險絆倒，台上她不停與阿Sa咬耳仔，當她得知播放次數高達1,278次時，即驚訝地「嘩」了一聲：「聽到播放率次數都傻咗！」問到奪傳媒大獎的信心時，她說：「最有信心唔係今年，反而係《我的驕傲》嗰年，不過我都有信心，今年成績對自己有交代，攞埋係錦上添花！但世事估唔到，唔會太刻意製造圓滿畫面。（有信心奪《十大勁歌金曲》最受歡迎女歌星同亞太區最受歡迎香港女歌星？）唔好開咁大張空頭支票畀我！」今天是阿Sa生日，問到送甚麼賀禮時，祖兒笑說：「送條命畀佢！呢排我好攰，又唔夠瞓！」

穿上高踭鞋的鄭融，扭身扭勢熱舞娛賓。

祖兒抱病開騷，Eason即為對方按摩減壓。

對於奪傳媒大獎的信心，Eason懵盛盛說：「上年唔係我咩？（係謝安琪！）冇所謂，有當然開心，冇都唔會唔高興！（宣布唔攞獎？）唔會，講咗後悔點算？唔攞獎最多唔嚟！（唔去都畀你？）吓？有啲咁嘅頒獎禮咩？」

基仔謝安琪缺席

而謝安琪、古巨基、何韻詩及張敬軒昨日缺席記者會。新城高層朱明銳表示，今年將頒發逾百獎項，更指祖兒、Eason及軒仔成績較佳。對於過去與新城鬧不和的基仔，曾缺席兩屆勁爆頒獎禮，問到今年會否彌補他，朱明銳說：「佢年中先加盟新公司出碟，有啲吃力！」

此外，祖兒前晚抱恙與Eason出席《麥當勞愛心音樂日2009音樂會》，最近經常四圍飛的她，希望聖誕節能閉關一天睡覺。