艾粒成員少爺占和Donald合作七年，向來形象搞笑出位，下月將在聖誕節期間演出《普世歡騰核能人》搞笑騷，繼續發放無厘頭笑彈，但他倆自爆完成舞台劇後，將暫時分開各自發展，最快要等到2012年才復合！

少爺占表面對Donald「蝦蝦霸霸」，實情感情深厚。

少爺占和Donald透露「艾粒」將暫時解散，各自發展。

雖說是告別作，但少爺占表示今次只是以艾粒名義放大假，電台、電視及廣告還是會繼續：「唱片同舞台騷就會停一停，各自做番啲自己嘢。（唔捨得？）唔會，咪當放吓大假，但可能長到十周年先會喺番埋一齊。（粉絲有冇話唔捨得？）唔會㗎！佢哋轉得好快，對佢哋係一個考驗。」

早前傳出與拍拖14年的女友Tina好事近，問到是否因要結婚才「拆夥」？少爺占笑說：「結婚？唔結啦！睇吓呢個騷賣成點，賣得就結。」

而Donald與女友Jan拍拖多年，他透露已有生仔計劃：「每次出碟做騷，我哋都要用好多時間，冇辦法生到仔，有壓力呀！如果仲係咁出品唔會好囉！同埋我深信我哋嘅仔女走埋一齊，命運都係一樣，阿占個仔會恰我個仔！」

Kenny恤髮助演出

提到今次《普》騷，艾粒表示將出動人情牌，邀請與他們同期出道的Sun Boyz、Shine和E-Kids等演出，Donald說：「不過我哋未正式搵佢哋，淨係同關智斌講過吓，佢話會恤定髮嚟。（整蠱佢哋？）我哋會玩啲變態嘢，但依家未講得住，亦會將廣播劇真人版搬上舞台，少爺占會扮攣攣哋嘅男仔，我會扮古裝人。」