20/11/2009

播放本新聞相關短片

馮德倫睇中張雨綺鄉土味

馮德倫與周星馳雖是合作夥伴,但彼此從不過問私事,他更力撐星爺從沒令他覺得難堪。

馮德倫(Stephen)執導星爺監製的新片《跳出去》,由於易角關係,故由籌拍到上映整整花去三年,他無奈地說:「人算不如天算!」對於不時有傳星爺與朋友合作後反目收場,Stephen則坦言不覺對方控制欲太強:「佢淨係要求我喺質感方面盡量做到農村Feel,大家開會意見當然有,但最終佢都係同我講:『你係導演,你決定啦!』」

談到彼此關係,Stephen不諱言合作期間與星爺經常碰面:「都係開吓會,唔會約出嚟食飯傾私事,大家只係工作上嘅夥伴!」至於《跳》片被指甚有「周星馳影子」,Stephen說:「拍喜劇邊個及得佢?當張藝謀新片都話抄襲佢嘅時候,有佢嘅影子點計都係一件好事。」

拍攝屢遇阻滯

《跳》片講述熱愛跳街舞的村姑張雨綺(Kitty),打算到大城市省招牌,期間遇上富家子立威廉,愛情故事猶如當年的《風月俏佳人》。Stephen有感農村背景是重點所在,故不惜長途跋涉遠赴「荒山野嶺」開工,拍攝時亦遇阻滯:「嗰度喺上海要揸五、六個鐘車,再行多半個鐘先到,試過拍拍吓有個女人走出嚟阻住個鏡頭,話佢塊田收唔到租用金,擾攘咗兩個鐘先發現,原來係佢老公收咗錢冇出聲!」

讚立威廉討好

談到電影要易角重拍,Stephen在短時間內決定起用立威廉,原因與其外形不無關係:「佢着起西裝感覺就係一個CEO。(Kitty似村姑?)第一次喺星爺公司見到佢,話佢學緊跳街舞,星爺叫佢表演兩招,竟然由Office跳到去天台,當時覺得佢簡直同角色一樣。」

Stephen自爆「易角」之初,電影公司曾打他主意,叫他兼任男主角,最終他與吳彥祖同以「串星」身份亮相,總算對戲迷有所交代。

影視組