吳嘉龍（Carl）老竇吳耀漢雖然係百分百嘅中國人，但Carl話晒喺英國長大，講英文仲多過講中文，所以佢啲廣東話一直都只算合格，而且仲成日因為講廣東話搞出唔少笑話。Carl同小小So話平時都會盡量學多啲，起碼畀人話都知咩事。小小So就覺得學咩語言都好，最緊要首先學識當地嘅粗口，Carl聽到即刻點晒頭，仲話兩年前就真正學識香港嘅地道粗口！
Carl話兩年前拍戲，自嘲名氣可能冇乜，所以容易畀人恰，拍戲期間因為走錯位NG幾次，即刻被人問候：「我之前都聽過啲粗口單字，但今次成句真係第一次聽，當時聽到都幾難受！（句粗口係咪問候埋家人？）好彩冇，如果話埋我屋企人，我一定會打人，唔係講笑！所以因為呢次先真正認識香港嘅粗口，但我點嬲都好，都唔會咁樣話人！」Carl仲話一人做事一人當，就算自己唔啱畀人鬧，都唔關屋企人事。小小So覺得Carl雖然係半唐番，但都知道中國有句「禍不及妻兒」嘅道理！