《宮心計》氣勢如虹，非無綫親生女的《巾幗梟雄》「四奶奶」鄧萃雯眼見奪獎存暗湧，難言勝算的她表示以「主」為重：「我已得到生命真諦，點解仲要爭個獎呢？」

解讀：雯女咁講，唔通暗示爭視后嘅佘詩曼、楊怡未搵到生命真諦、好物質化？

《宮心計》 中劉三好的「說好話、做好事、存好心」深入民心，連陳豪（Moses）都以此為遲到遮醜，笑言已經廁所都唔去便趕來：「劉三好有三好，我就有三急。」

解讀：連爛Gag都不忘硬銷劇集金句，Moses認真識做！

傅穎被寸百變

傅穎鼻現橫痕，鄧麗欣的密友方力申即寸：「新形象？萬聖節呀？佢形象好百變！」

解讀：鼻頭有條痕啫！唔使寸人似鬼呀？

豆沙包拒做「深」交

豆沙包梁梓悠與無綫監製錢國偉互相攻擊，她語帶雙關暗寸：「只怪我同佢嘅交情唔夠其他女仔深！」

解讀：一個「深」字可圈可點喎，豆沙包！

謝霆鋒講BB顯文采

謝霆鋒終於承認老婆張栢芝再度有喜：「坦白講，女性身體有變化係真嘅！」認真可喜可賀！

解讀：真有老竇謝賢文采，形容有BB都可以咁有深度！

Lavina逢冬天甩拖

Lavina（鍾蕙芝）自爆：「一到冬天啲男友就同我分手。」身材爆棚的她感情空白，向外發表求偶宣言！

解讀：咁講法，想話啲男仔唔係貪戀你嘅身材都唔得啦！

王希瑤咪咪休息

亞姐亞軍王希瑤出名愛玩「變幻球」，日前卸下武裝，甩掉Nude Bra以真胸示人：「咪咪都攰，要畀時間佢休息！」

解讀：咪咪要休息，皮膚都要，佢又幾時以「真」面目示人？