湯盈盈同錢嘉樂呢對緋聞情侶愛得低調，雖然屢傳嘉樂「翻撻李珊珊」，又或者兩情變壞消息，但佢哋依然被公認係一對。早前盈盈同嘉樂出席將軍澳電視城嘅台慶亮燈儀式，當晚小小So見佢哋甚少「行埋」，想影張合照都影唔到，尤其係嘉樂成日神龍見首不見尾，只見到着住吊帶晚裝嘅盈盈出出入入，嗰晚性感嘅花旦唔算多，所以盈盈零舍搶鏡。
小小So：今晚着得咁性感，嘉樂仔有冇讚你呀？
盈盈：有！吳家樂有讚呀！
小小So：吳家樂？佢都唔喺將軍澳，佢喺荃灣做直播喎！
盈盈：係咩係咩？
盈盈想使出一招聲東擊西，但一時醒唔起吳家樂唔喺將軍澳，即時穿崩，連小小So都覺得佢鬼咁尷尬！
