萬事俱備只欠人和
誠如柴九的金句「人生有幾多個十年」，祥仔入行十年又十年，打從85年入訓練班起，入行足足24年，祥仔頭廿年走出的路是有血有淚的，今年他終有機會登頂，一嘗視帝滋味，他已有了天時地利，欠的就只是人和，因為他不是無綫的親生仔。以無綫Die Hard慣例，祥仔攞視帝一定「冇行」，但自去年夏雨和米雪打破親生之說，今年勝算高了許多：「以前大部分嘅人都係TVB，唔畀親生嘅仲可以畀邊個，依家情況唔同喇，我幫公司賺到錢就得啦！TVB咁大個台唔會做一啲對自己冇益處嘅嘢，如果我淨係拍一套《巾幗梟雄》，佢哋就一定唔會畀個獎我，始終呢個係商業社會！」
有經歷的人是謙遜的，但有料的人講太多矯飾說話卻變得虛偽，對於視帝，祥仔信心十足：「今年機會好高，Overall《巾幗》係最標青，唔單只收視，仲贏埋口碑，可以咁講今年我冇乜對手，《宮心計》以女人戲為主，陳豪發揮唔大，《富貴門》就唔知發生乜事，收視麻麻！」雖然是大熱中的大熱，不過祥仔覺得就算自己未能逼陳豪讓出「帝」位，成為最佳男主角，自己已對自己有所交代：「攞唔到我都唔會唔開心，成績唔係講獎項，一個演員嘅成績，60%係觀眾；35%係老闆；5%先係獎，我做戲係畀大家睇，老闆又賺錢，有冇獎真係冇所謂，觀眾同老闆認同我已足夠，當然嗰5分都攞埋就最好啦！可以錦上添花！」
我的三個十年
祥仔信命，可是他的命運卻是自己行出來的，入行第一個十年，祥仔是一個乖得連對白也一字不漏倒背如流的演員；第二個十年，祥仔選擇出走，走去挑戰一個沒有無綫照住的不穩狀況：「我試過一個月開得兩日工，逼住要賣走架貴車供樓，無疑我個心係反叛咗，但係我唔出去闖吓，自己都唔會進步；第三個十年的確係行運，如睇相佬所講，呢啲可能係奇光異彩！」
後記：萬能阿四
藝人接受訪問，陪伴的多是經理人或助手，可是柴九身邊的，卻是「柴嫂」Julia，着衫、梳頭、影相，Julia一腳踢搞掂，祥仔笑稱老婆是萬能阿四！談到相處之道，祥仔說：「老婆係上天賜畀我嘅，我人生之後嘅幾個十年都要靠佢！」