三好佘詩曼是一個不信命的人，無論事業或愛情或人生觀，她想做就做，非常Hardcore（硬淨）。踏上達十年爭名逐利之路，阿佘很想Break一Break，可惜無綫暗地委派「劉三好」狙擊「四奶奶」鄧萃雯，她惟有重披戰袍，為「親生」族類爭一口氣！
無綫點兵，阿佘多多益善，自言獎項不會嫌多：「個個都爭，我梗係要爭埋一份啦！唔爭會好冇面o架！得一個獨大，頒獎禮就冇氣氛。」談到自己的優勢，阿佘說：「大家都好努力，大家都有優勢，冇一個演員係唔特別，雯女做四奶奶都深入民心，但三好都一樣，唔會輸蝕，同樣亦得到觀眾認同！現實中，我唔會搞乜攻心計去爭獎，因為我唔會去害人！」
阿佘雖然「被迫」踏上戰場，不過她已不像從前一樣，為了名利，放棄一切，包括自己最疼錫的媽，決不被命運牽着鼻子走：「我要改變自己嘅工作心態，以前真係太過拚搏，依家一定要變番做學生心態，每年一定最少要放一兩個月假！」
母親死過翻生得啟示
阿佘心態的改變，原來自母親的一場大病，差點令她終身抱憾：「我之前一直冇做好做女嘅責任，幾年前我因為趕拍《東方之珠》，日接夜夜接日咁開工，忙到不可開交，當時媽咪肺部被細菌感染，心跳一度停頓，要電佢先可以醒番，自己完全冇機會探佢，我覺得自己好不孝，好彩媽咪最後大步檻過，呢一次真係畀到我好大啟示！」
花無百日紅，阿佘除了希望做乖乖女外，縱使擁有不易老的童顏，也不願就此捱殘：「到咗人生另一個階段，我唔想咁快做殘，一定要保養一下，做人唔可以淨係Output（出），亦都要有Input（入），我需要真正嘅呼吸！」
佘穎戀：拍拖未必開心
有愛情的女人，面上似搽上紅粉緋緋的胭脂，可是從阿佘的面上，只看到那經歷大千世界錐心蝕骨的風霜，對於拍拖，她官腔地說：「我依家忙到死，就算畀半個男朋友我都駕馭唔到，我依家乜嘢都唔要淨係想瞓覺！」阿佘曾透露曾與鄭嘉穎發展過，更對此說：「我講嘅都係事實！」但外間有傳「佘穎戀」已告玩完，從她講的一字一句，看來是事實居多，但對嘉穎的態度依然冇變：「喺我眼中，嘉穎依然冇變，佢依然係一個好有風度同好孝順嘅男仔，我諗都係保持朋友關係會好啲，關係可能會長久啲！有時拍拖未必開心。」
阿佘十分喜歡小朋友，她講過希望日後能開幼稚園，天天都可以奉旨看見天真的笑臉，她表示自己都想結婚，連佘媽也想在有生之年，看見她覓得如意郎君：「媽咪係想我結婚，不過細佬舊年已經完成佢心願，成家立室，依家都冇催我喇！我諗依家令媽咪最開心係，我哋嘅聯名戶口多幾個零，可以成日陪佢旅行！」
金牌經理人
訪問當日，阿佘經理人Tina亦在場，講到《宮心計》收視話題，阿佘問Tina：「今個禮拜幾多點呀？」阿佘肚餓，亦會問：「Tina，我想食嘢！」問她：「冇咗邊個唔得？」她說：「依家冇咗Tina唔得！」十足十小朋友一樣的淘氣！