憑「柴九」一角成為視帝大熱的黎耀祥，昨日出席活動時表示對獎項順其自然。提到四奶奶鄧萃雯日前以性感低胸打扮出席台慶記者會，他笑言很少見對方行性感：「真係有啲睇唔慣！（四奶奶叫你嗰晚執正啲？）我哋呢啲係實力派，佢先係偶像派，依家我未特別諗着咩，可能着番上年套衫。」對於Facebook上有逾萬網民支持他奪獎，祥仔表示多謝大家支持。
他透露明年三月開拍《巾幗梟雄2》：「到時會減多十磅先開工，所以叫佢（雯女）小心啲，我分分鐘瘦過佢！（叫雯女瘦邊度？）心口唔可以，要Keep住！我同佢都係頭大大，所以瘦面先。」
另外，鄭嘉穎日前到馬來西亞宣傳時表示，睇好黎耀祥能奪得視帝，問到今年會否與緋聞女友佘詩曼同登視帝、后？他說：「哎吔！點解唔聽人講嘢，都話睇好祥仔！」