距離《萬千星輝頒獎典禮》不足一個月，鄧萃雯、佘詩曼與楊怡被熱捧為視后三大熱門，原本被睇好的楊怡近日聲勢回落，反而被指獲好友劉曉慶出招相助、與無綫破冰的雯女奪獎呼聲甚高，形勢峰迴路轉。最近，雯女繼續積極備戰，除了找好友黃偉文擔任形象設計外，日前她出席活動後還急急前往尖沙咀一間時裝店挑選靚衫，不消一會已拿着大袋心水戰衣返家仔細挑選，務求於頒獎典禮當晚艷壓全場。雯女前晚到福建出席《東南勁爆音樂榜頒獎盛典》，全程甚為風騷，與好姊妹蔡少芬及陳法蓉等雞啄唔斷。
各有捧場客
另一熱門佘詩曼眼見楊怡氣勢回落亦乘機發功，希望取而代之與雯女爭一日長短。雖然連日趕拍新劇《天與地》，但阿佘不敢怠慢，日前趁不用開工便即往美容院扮靚，逗留足足三小時才捨得離開。離開時，阿佘心急致電司機前來接載，但邊等邊發忟憎，最終截的士回家。
前晚，阿佘於中環趕拍新劇，劇情講述因其男友逝世，失眠的她出街掉大袋垃圾。休息期間，她被追問感情事即顯得一臉避忌，只表示單身的她不急於拍拖。阿佘還透露台慶夜會以古裝及民初裝打扮現身，至於頒獎禮當晚的服裝，她表示還未找到贊助，但當得知勁敵雯女有黃偉文負責形象設計時即反應極大：「吓！咁我都要快啲去搵贊助同靚衫喇！」看來她想發揮劉「衫」好精神，不想輸視后又輸打扮！
對於視帝、后花落誰家，一班無綫藝員也各有心水，其中馬德鐘表態支持阿佘再奪視后，但前四葉女龔嘉欣則表示看好「四奶奶」鄧萃雯成為視后，視帝方面則睇好黎耀祥。而張嘉兒同樣看好「柴九」，她說：「視帝方面就睇好黎耀祥，我好細個已經鍾意睇佢喺《西遊記》入面做豬八戒嘅角色，好希望可以同佢合作！」
佘詩曼後台夠硬
年 齡：34歲
入行年資：12年
代表作：《金枝慾孽》、《鳳凰四重奏》、《宮心計》
獎 項：06年連奪「最佳女主角」及「我最喜愛的電視女角色」
後 台：無綫製作資源總監樂易玲、監製梅小青
收視率：《宮心計》首播即錄得平均34點收視，最高達36點，打破自03年以來一線劇首播收視紀綠，上周更上升至最高40點。
鄧萃雯勝在長戲
年 齡：43歲
入行年資：25年
代表作：《巾幗梟雄》、《金枝慾孽》、《女人唔易做》
獎 項：03年及04年「我最喜愛的實力非凡女藝員」
後 台：無綫製作總監曾勵珍、監製李添勝
收視率：《巾幗梟雄》首周收視平平，但隨着戲味愈濃，收視節節上升，至結局篇時收視高達47點，平均也有42點。