名模Ana R.、Lisa S.與「翻版徐子淇」鍾浠文等昨日為首飾品牌Mikimoto行騷，Ana R.澄清早前所拖的型男並非新歡：「係我男朋友David！可能嗰日佢着咗唔同衫先畀人認錯咗，我哋拍咗拖半年喇！（見家長未？）未！但我媽咪聖誕節會返嚟香港，而我都有同佢媽咪傾過電話。（慶祝拍拖半周年？）冇呀！早排有慶祝生日，佢送咗好多CD同增長睫毛液畀我，要特別訂製㗎！其實佢平時都送好多青蛙嘅嘢畀我，因為佢知我鍾意青蛙。」她又透露已搬新居，母親到訪也有足夠地方住，不用如往年般瞓地氈！問到可會與男友同居？她即顯得怕怕地說：「唔會！我以前拍親拖都好快同男友同居，依家唔會咁做！」

鍾浠文擇偶唔睇樣

同場的鍾浠文表示剛返安徽一個月，因大吃大喝而增磅。單身的她自言渴望拍拖：「我唔鍾意靚仔！（醜樣都得？）如果鍾意就唔覺佢醜樣！男友唔需要有錢，最重要照顧自己同成熟。」提到今屆亞姐多為內地佳麗，記者提議她明年參選？她說：「選美唔止要靚，好似仲要讀好多書喎！」