前晚江若琳（Elanne）、鄭融及趙碩之等出席彭發新片《關人7事》首映禮。Elanne與傳緋聞的周柏豪同台出現即成焦點，司儀要求二人拖手合照，起初Elanne一臉尷尬，其後作狀靠向周柏豪，事後她說：「佢缺席咗幾次宣傳，今晚終於搵番個『男朋友』，所以唔尷尬，大家咁有默契，好想同佢合作！」

《關人7事》演員前晚出席首映禮，場面熱鬧。	鄭融十分興奮，在台上手舞足蹈。	一身中性打扮的Wylie，自爆求學時多同性追求者。

以超短裙上陣的Elanne直言，覓得形象指導Celia後，省回不少置裝費，但卻遭對方暗示品味差：「佢上我屋企，見過我以前買嘅衫，竟然叫我全部丟晒去，搞到我好心痛。」前晚她怕走光步步為營，問到可曾遭偷拍裙底，Elanne即說：「試過有男人揸住部DV機一直跟住我，我驚到走去超級市場度匿埋，然後打畀媽咪叫佢落嚟救我。」

趙碩之遇同性示愛

而同場的趙碩之以中性打扮示人，配合《關》片內的同性戀角色，她說：「讀書時同性追求者比較多，鍾意我嘅通常都係Tom Boy，入行後知道自己多咗影迷係Tom Boy添！」當時因為經常參加運動比賽，故她甚得同性追求者歡心，更有人出奇招示愛：「對方逼我埋啲Locker度愈黐愈埋。（想咀你？）唔知，或者想『互動吓』囉！」由於與同性接觸比較多，Wylie不諱言曾對異性的追求者卻步。