郭富城高調滅「杧」後，獲得最後勝利的熊黛林昨日由上海風騷回歸，雖然身心俱疲，但難掩勝利笑容，更趁機踩多腳說：「講清楚咪好囉！」
熊黛林（Lynn）早前與王秀琳（Mango）為爭「城嫂」之位而隔空開火，一直未有正面表態的城城，前日終親自澄清「王小姐唔係我緋聞女友」，更寸對方「諗多咗」，令正印Lynn放下心頭大石，穩坐「城嫂」寶座！
昨晚7時許，獲城城「御准」升呢的Lynn，由上海拍攝《花田囍事2010》返港，雖然因長途跋涉而面露疲態，但當聽到城城開腔與Mango劃清界線後，即露出勝利笑容，更明潤「(火羅)杧」說：「講清楚咪好囉！」
已送生日禮物
手持Chanel手袋及戴上黑超的她，在助手陪同下現身機場，甫見記者即風騷揮手打招呼。談及城城親自「滅杧」，她說：「呢啲係佢自己嘅事，講清楚咪好囉！（城城向你派定心丸，開唔開心？）唔關我事喎！我唔會理呢啲嘢，我好攰呀！喺橫店坐咗兩個鐘車去杭州，再搭飛機返嚟，真係好攰，畀我抖吓啦！」問到返港後會否與城城補吃生日飯，她即撒嬌說：「總之我送咗禮物畀佢就得啦！（你哋冇嘢呀？）冇嘢，點會有嘢啫！（唔開心？）冇乜感覺喎！總之我好攰，畀我過多兩日再講。」
城城再度封嘴
至於城城昨日出席《泰國北部親善探訪記者會》時卻玩封嘴，未有再為戀情高談闊論。他捐出《舞林正傳演唱會》的騎士造型Figure公仔，為聯合國兒童基金會的「兒童之友」籌款，工作人員透露有神秘人已出價400美元（約3,100港元）競投，問他會否叫「好好朋友」Lynn競投再回贈給他，城城只笑而不語。城城表示此行看見很多人十四、五歲便結婚，結果因年少無知而出現很多問題，問他是否因而遲婚，他避而不答：「我好忙㗎！好多嘢做，又要做慈善活動呢……所以我呼籲身邊嘅朋友支持。（係咪指『好好朋友』？）係沈嘉偉！佢好好，好主動聯絡我，問我慈善賽車係咪要籌100萬，唔夠就包底喎！」
