台灣女星郭書瑤（瑤瑤）挾「宅男女神」之名力攻香港市場，加上先天身形條件優厚，自然吸引唔少男Fans膜拜啦！不過，其實瑤瑤咁得男仔鍾意，真係有道理㗎！皆因佢真係好鬼可愛，去到邊都最緊要開心，就算同你只係識咗冇幾耐，只要佢覺得你好玩，都會係咁追住你玩，所以要同瑤瑤做朋友，真係少啲精力都唔掂！
不過唔講唔知，瑤瑤有一個好得意嘅習慣，就係佢一定要過咗下晝兩點幾先會清醒。有次小小So喺中午十二點幾撞到瑤瑤，見佢唔單止冇晒平日古靈精怪嘅表情，連反應都慢半拍，之後佢經理人就幫佢同小小So解畫：「佢係咁㗎！朝早起身冇乜反應，連笑容都會好牽強！不過只要過咗兩點幾，佢就會成個生猛晒，係咁搵人鬥嘴，到時你想享受寧靜嘅日子都難，所以我都唔介意佢朝早發呆，起碼我耳仔唔使受罪先！」
經理人講完唔夠兩個鐘，小小So的確發現所言非虛，因為瑤瑤果然踏正兩點，就成個人有一百八十度轉變，周圍搵人係咁玩，認真神奇！啲人成日話會有「落床火」，估唔到瑤瑤就有「落床呆」，身為女神嘅佢，果然「非同凡響」！