鄧麗欣（Stephy）同方力申呢對係人都知拍緊拖嘅緋聞情侶，雖然寧願背負「大話歌手」惡名，都要擘大眼講大話唔認拍拖，但佢哋經常眉目傳情兼隔空互撐，明眼人都知佢哋「有嘢」喇！
早排小方同豬流感（H1N1甲型流感）好番嘅Stephy喺上環拍攝合唱情歌《七年》，因為當日係Stephy病愈後首日開工，小小So就去探班問候吓佢。嗰日小方率先到場，當在場記者抱怨Stephy遲到大半個鐘搞到記者呆等，小方即刻發功幫Stephy，佢嗰種幫到出晒面嘅行徑，完全洩露咗佢哋唔係普通好朋友或者好同事咁簡單！小小So聽到佢哋嘅對話：
小方：Stephy仲未到，不過你哋同我傾陣偈先或者影我啦！佢好快到。
記者：有冇搞錯呀！等咗成半個鐘啦！
小方：應該係塞車，家陣好塞車㗎！
記者：未到放工時間都塞車？
小方：咁……佢要車埋個新人嘛！部車車兩個人，梗係遲啲㗎啦！好快，好快到，等多一陣啦！不如再做多次訪問，時間好快到。
當Stephy到場時，小方一個箭步走埋Stephy身邊影合照：「我哋快啲影張合照畀記者交差，佢哋要趕住走呀！快快快！」