叫「前輩」陳豪放水
憑《巾幗梟雄》中柴九一角上位的黎耀祥，去年奪台慶最佳男配角後，今年「升呢」挑戰視帝。但並非「親生仔」的他，與無綫傾包薪合約問題仍在膠着狀態，加上《宮心計》殺出，收視、話題俱存，劇中皇帝陳豪即成祥仔的最大阻力。
雖然「稱帝」前景未見明朗，但祥仔昨日出席《小母牛做牛做馬音樂會》時，卻並未如鄧萃雯般放棄爭獎：「佢梗係唔在乎啦！依家有咁嘅地位，啲獎當然濕濕碎！」雖然因工作繁忙只略看過《宮》劇，但他大讚「對手」陳豪出色：「陳豪我一向都鍾意，佢演戲方法幾特別！」他不諱言陳豪是他最大勁敵，更出口術要求對方讓獎：「佢都攞過啦！唔好嘥！佢依家有個獎喺屋企，多一個咪阻碇！我屋企有好多位擺嘢，不如讓吓我呢個『後輩』啦！」活動期間有不少人大嗌支持「柴九」，祥仔即打趣說：「啱喇！要投票o架！公司話要睇票數，就算老細都話唔到事！」
過來人夏雨幫手拉票
去年夏雨以非親生族奪視帝，他昨日接受電話訪問時亦為祥仔助威：「一定睇好祥仔，今年佢最突出，以實力嚟計，應該係佢攞！」談到祥仔仍未簽約，過來人夏雨即說：「我舊年都係咁，TVB咁大個台應該公正嘅，不過未簽約的確可能係佢攞唔到獎嘅少少原因，但係依家有咁多人支持佢，我諗TVB唔會搞小圈子嘅！」他又力Sell祥仔說：「佢以前演小角色已經公認好演技，拍電影都被讚，今年佢遇到個咁好嘅角色，應該係佢啦！」至於陳豪，夏雨則潑冷水：「《宮心計》以女人戲為主，男人做得冇咁突出！」
獲神級影后力撐
無綫刻意安排《宮心計》搶攻台慶頒獎禮，派出佘詩曼和楊怡狙擊鄧萃雯奪取視后，意興闌珊的雯女深知奪獎機會渺茫，前日出席活動時公開發表「愛主不愛獎」言論，擺明無心戀戰，但雯女一番肺腑之言卻誘發網民惻隱之心，早前在討論區視后投票仍落後於楊怡的她，近日反力壓「佘楊」，成為網民心中真正視后。
與此同時，雯女獲內地國寶級影后劉曉慶力撐，揚言會為她抱不平，向無綫副主席及董事總經理方逸華「公車上書」。劉曉慶前晚舉行生日宴，亦表示睇好好友雯女為視后大熱：「她之前到內地拍的電視劇也是我邀請她的，我當然會支持她！」
劉：向方逸華建議
對於有傳雯女非無綫親生女，成為她奪獎絆腳石，劉曉慶即問為何雯女不簽約，當知道她是希望自由身時，劉曉慶即說：「那為甚麼不簽約就沒得獎？如果真的是這樣就不公平了！我們永遠都不能成為無綫視后了！我覺得有份演出就有權得獎！」其後她更說：「我要建議一下，該跟誰說？（方逸華？）那好，我跟她建議一下！」
得到神級影后支持，雯女奪獎重燃希望，有份出席生日會的她更笑到見牙不見眼，難掩興奮地說：「多謝朋友支持，佢一直都好關心我，除咗工作之外，我嘅感情生活佢都好緊張。」她表示劉曉慶經常着她學好普通話到內地發展，笑言可結交內地男友來「進修」，雯女亦認同：「我覺得內地男士較適合我！」
採：影視組、名人組 文：專案組