拍戲之餘，任達華明年9月將會喺紐約開攝影展，主題係「五季」，主角就係殘花，即係影啲又殘又舊又爛嘅花。小小So有次見到華哥，佢即滔滔不絕咁講呢個影展，仲騷咗幾張作品出嚟，小小So望咗好耐，完全睇唔出係殘花，因為啲相顏色既靚又特別，不禁大讚佢技術超然！
華哥話影展會展出60幅作品，希望可以有1萬種顏色：「啲花真係有萬千種顏色，每一朵都唔同，我依家不停搜羅緊！今次主題係『五季』，嚟緊仲會有『六季』。『六季』都係以殘花為主題，不過就會係畫畫形式，用油畫同水墨畫等，之後仲有『第七季』、『第八季』，不過就未諗到係乜嘢形式，因為科技太先進，要睇吓嚟緊係點，先再作決定！」華哥咁忙，小小So好奇佢邊有時間做咁多嘢？佢話：「我暑假時放咗兩個月假陪囡囡，『五季』就係喺嗰兩個月籌備。」