平胸一族的阿Sa，昨日與吳君如、許紹雄及陸毅等拍攝王晶新片《美麗密令》，現場四名噴血索女包括高海寧、梁政珏、動漫Maggie李曼筠及翻版舒淇林佳菱均以比堅尼登場，阿Sa也不禁眼甘甘望到實，並直豎拇指大讚身材好。其後阿Sa被安排企中間合照，即顯得非常尷尬，滿面通紅。君如更鬼馬地教阿Sa以批(月爭)甫士搶鏡，不料她起手即撞正高海寧的巨乳。

阿Sa（左）不時偷望四位巨胸靚女。

與李曼筠（右起）以水着示人的高海寧，為免再被「胸襲」，要以手輕擋阿Sa手臂。

挑戰尺度掂巨乳

阿Sa坦言在片中會以三點式示人，並有機會與巨乳有零距離接觸，問到剛才碰撞到高海寧的咪咪，阿Sa說：「軟腍腍、暖笠笠囉！我夠有啦！不過佢哋大D，我大A囉！（羨慕？）我都有啦！」她又指現場波女均高她一個頭，故於服裝間借來四吋高踭鞋穿着。

同場的吳君如亦笑言想以泳裝示人：「但係王晶同我講：『着泳衣使乜驚？我哋喜劇嚟o架！』聽到我火都嚟，好似我着泳衣係笑片咁！」王晶則說：「廿幾年前叫君如喺《求愛敢死隊》着泳衣，佢都係着潛水衣，唔通再叫佢着咩！」