經歷去年金融海嘯,不少人對投資都變得好謹慎,好似圈中小富婆郭羨妮(Sonija)咁,早前見樓市轉好,即刻將手頭上嗰層樓放咗,雖然賺咗40萬,袋袋平安,點知之後樓市一路不斷升,難怪Sonija同小小So講話有啲後悔。
小小So:最近樓市當旺,有冇諗住再買番層樓?
郭羨妮:有呀!媽咪成日催我買樓,但要搵層可以養狗嘅大廈真係唔容易,所以仲睇緊。
小小So:其實你之前嗰間都幾好,點解要賣?
郭羨妮:之前嗰間連埋車位500幾萬,我見有40萬賺,所以咪出貨囉!點知依家升到可以賺100萬,諗起都有啲肉赤。
小小So:未來投資有乜策略?
郭羨妮:以前都有買吓仙股,但爸爸話快上快落太危險,依家主要買番啲穩陣嘅藍籌股;雖然我冇買過雷曼,但喺滙豐好高位時都入咗啲貨,之前跌到30幾蚊都嚇餐死,好彩呢類長線股,擺得耐都可以升番,用嚟長線投資最啱。