樂隊Dear Jane其中三位成員Howie、Jackal和Tim，日前應邀出席由Yan及歐陽靖主持的《Cooking媽嫲》節目。三位成員即場炮製名為「迪亞珍海陸空雜炒王」菜式，雖然三個大男孩平日玩慣樂器，但拿起廚具時亦算有板有眼，他們把帶子、雞肉、牛肋骨及蔬菜等落鑊慢炒，不過Tim落調味料時卻稍為加多了鹽及豉油，在旁的Yan即不禁喝倒采及擺出拇指向下的手勢，指他們水皮，她還抵死地問：「啲帶子同雞肉係咪真係熟㗎？」場面惹笑。完成後，Yan便膽粗粗試食，吃得相當滋味，她笑說：「好彩啲帶子係熟嘅！（鹹？）咁又唔係好覺喎！」其後他們邊吃邊聊天，期間Howie還拿起結他即場Jam歌。

吳日言拿着半截蘿蔔當「豬鼻」，認真鬼馬。

Dear Jane平日玩得樂器多，拿起廚具亦有板有眼。（左起）Howie、Tim、Jackal

煮幾味冧女

主音Tim表示閒時也會下廚整幾味：「夾Band之後太耐冇煮，有啲步驟唔係好記得。」他自誇最叻煎鵝肝，緋聞女友楊洛婷更讚不絕口：「我試過煎三塊，佢（楊洛婷）食咗兩塊，鵝肝唔可以翻煎，要計啱時間，所以都幾難整！」至於Jackal直認不懂下廚，他還拖阿媽落水：「我阿媽煮飯麻麻哋好食，但佢煲湯就冇得頂！」Howie則表示未試過煮飯給女朋友品嘗，反而曾下廚煮給媽咪歎：「雖然我煮嘅嘢食賣相衰，但味道都OK，媽咪都有讚！」

文、攝：German