「祖薛戀」傳足四年，因早前祖名自爆有個拍拖四年半的女友，令大家聯想到是薛凱琪，不過女方前晚卻驚爆「入行後未拍過拖！」
薛凱琪（Fiona）自05年與房祖名合作電影《早熟》被傳撻着後，其後多次被發現出雙入對，前年祖名更明言公開戀情要看女方意願，令關係明朗化！日前祖名在節目《康熙來了》中，自爆交過四、五個女友，最長的一個拍過四年半，令人聯想到所指的正是Fiona！不過，前晚Fiona錄影《勁歌金曲》時，駁了新長髮造型的她，竟與祖名劃清界線，聲稱入行後從未拍拖。
唱情歌感觸狂喊
Fiona透露近日唱新歌《慕容雪》一時感觸狂喊，她表示箇中歌詞描寫女主角愛得投入，失戀時又會迷失自我：「某程度似自己，自己戀愛時會好投入，會冇咗自己，感覺好似畀人拎走咗！（試過畀人拎走？）有試過。」當追問是否被祖名拎走時，她立即澄清與對方是朋友，對於祖名說有位拍拖四年半女友，Fiona冷淡地說：「我冇試過拍一個四年或者四年半嘅拖，頂多都係兩年半至三年，而且仲係圈外人，入行之前拍，入行之後未試過拍拖！」
Dry談單身生活
03年出道的Fiona堅稱入行至今單身，當問到是否「Dry」了很久，她又說：「唔好講呢啲嘢。（同祖名分手？）我哋都冇拍過拖，又點樣分手？（祖名講嗰個係邊個？）唔知！我同佢係朋友，好少講愛情事，通常都講事業同埋開心嘅嘢，講愛情好尷尬。（點解尷尬？）我本身好少講吖嘛！」
雖然這段「祖薛戀」疑幻似真，但無損Fiona心情，她除了在新碟多謝另一位緋聞男友方大同，指二人會互相扶持，還在曝光的新碟私密照中，將閃石Bra當頭飾，扮成米奇老鼠，自得其樂，又大玩絲襪誘惑，不過當她聽到「誘惑」兩字即大呼：「黐線！」並說：「我從來唔覺得自己有美腿，只係一對腳，更加唔好用『誘惑』兩個字形容我，我覺得誘惑係代表Sexy、露肉同露背，我影相純粹係為咗Feel。」
採：影視組、音樂組 文：專案組 攝：唐豁莊