今年對徐子珊的最大挑戰是保持健康體魄殺入樂壇，月前她在內地拍戲做「打女」，卻因疲勞過度虛脫入院，醫生仍指她營養不良及貧血，但她堅持為處女碟撐到底：「我唔『冧』得㗎！又要開劇，隻碟又唔遲得！」她更曾怨健康不爭氣：「食嘢都冇乜胃口，可能係太緊張！」而初踏樂壇的她，坦言仍在適應中：「唱Live特別緊張，就算唔甩舞步同甩歌詞，都唔代表係好，只可算係Pass！要喺台上散發吸引力先算係好！」

徐子珊以跳舞歌手形象殺入樂壇，創造真我。	胡杏兒（左）及徐子珊先後進軍樂壇。	徐子珊拒絕在演戲及唱歌中二選一，實行雙線發展。

反應佳鬆口氣

回顧多年，古巨基算是鮮有由藝員攀上「一線歌手」的例子，反觀由女藝人躍升樂壇天后的例子則不多。一向有攞獎命的子珊，為當真正歌手，抗拒在唱歌及演戲中二選一：「唔取捨呀！我都好鍾意演戲，唔好逼我揀啦！」她承認從公仔箱殺入樂壇係存在一定難度：「開頭都有啲擔心！但見到胡杏兒同林峯做歌手嘅反應都好好，證明依家啲歌迷接受能力好高，希望佢哋接受埋我啦！」猶幸新歌推出後外界反應不俗，令她鬆一口氣：「好多人都同我講話鍾意我歌手嘅形象多啲！」

批評照單全收

對於入行初期曾被批評態度囂張，子珊解釋因喜怒形於色才惹來誤解：「識耐咗嘅朋友都知我個人係點，佢哋仲叫我Keep住咪改！」她笑言雖然品性難移，但EQ比以前高：「以前拍戲同拍劇嗰陣，Fans都報喜不報憂，但到我做歌手後，佢哋會將網上Forum嘅好壞評語都Print畀我睇，反而咁仲好，有客觀分析我先會有進步！」