徐淑敏與未婚夫黃浩（Kenny）將於下月15日註冊結婚，一直被指奉子成婚的她，近月出席活動時認時唔認，似乎擔心BB未足三個月小器。昨日Suki和Kenny擔任羅浮宮婚紗新店開幕剪綵嘉賓，終親口承認「有餡」三個月，預產期為明年四月初。依她公布的日子，兩人由六月撻着熱戀期，到七月已成功造人，短短30日已火速有喜，名副其實一擊即中！

照穿高跟鞋

大肚新娘Suki昨日依然貪靚，穿上三吋高跟鞋，又表示出席活動前花上三小時按摩、浸腳和通淋巴，最緊要扮到至靚。現場所見，粗身大勢的Suki腹部已見隆起，期間她接受訪問時頻呼「好凍」，可是身旁的Kenny卻「慢半拍」，要記者提示才脫掉西裝外套為Suki送暖。當時記者問Suki何時才承認有喜？她聞言只不斷微笑，Kenny見狀立即率先公布，他說：「差唔多！啱啱三個月。」隨即惹來全場恭喜，Suki亦報以甜笑接受祝福，問到之前是否怕BB小器所以不公開，她說：「都有啲啦！呢個係公開嘅秘密，不過我生完BB後都要繼續履行合約。」

徐淑敏狂嗌好凍，Kenny要人提示才脫掉西裝外套給她。

Suki與Kenny提起婚禮安排及BB即喜上眉梢，且笑容一致。

讀字典胎教

Suki坦言現時每日飲食也分外小心，亦有定時照超聲波，但仍未確定BB性別，她笑說：「正面睇以為係女，但反轉睇又似仔。」她希望第一胎是女兒，因女仔較溫柔，言談間更似乎準備為Kenny生多個，她說：「生女可以照顧到細佬，我哋兩個都有家姐。（有冇胎教？）朋友叫我讀字典畀佢聽，因為有個朋友都係咁，個女讀書科科A，所以都會試吓，橫掂我喺屋企冇咩做。仲有我學緊日文，都讀埋畀佢聽，多元化啲。」Suki完成本月17日的工作後將停工一年，至明年九月才復工，她說：「公司冇詐型，唔係都唔批啦！依家仲差一日影外景婚紗相，其餘都搞得七七八八，18號就過大禮，呢樣嘢Kenny緊張啲。」

昔日的索爆咪神Suki認大肚結婚，令不少宅男幻想破滅。 資料圖片

SoSo姐金句：泵大個肚話咁快，咪神嫁人唔使捱。

採：影視組　文：專案組　攝：黎志輝