楊怡、Chilam、胡杏兒、謝天華及洪卓立（Ken），昨日為無綫新劇《魚躍在花見之朝》試造型。離開無綫五年後回巢拍劇的Chilam，以賣魚佬Look示人，期間他更「亂噏廿四」，自爆在劇中除了與楊怡有感情戲外，更有一幕強姦戲，又表示會與楊怡及杏兒有親熱戲，他說：「劇情係講一個壽司師傅嘅成長，所以會成日去魚巿場拍攝，我可能要有心理準備去劏魚。戲入面同楊怡、杏兒發展三角關係，所以同佢哋應該有親熱戲！（老婆靚靚會唔會呷醋？）講笑啫！劇本都未出！（使唔使備案？）開玩笑！」

睇好雯女攞視后

至於楊怡得悉Chilam「自度」感情戲後即踢爆：「我唔知同張智霖有感情戲喎！其實我係同天華一對嘅！可能佢對我太有幻想喇！」對於外間熱捧她憑《宮心計》榮登「視后」，她說：「我成日畀個背脊人睇，所以叫做『視后』！其實我對獎項抱平常心，不過對於《宮心計》好有期望，因為係我首次演奸角！（視后大熱？）都開心嘅！起碼可以為套劇宣傳。（睇好邊個？）雯女（鄧萃雯），我都有睇《巾幗梟雄》，佢真係演得好好！（為你鋪路攞視后？）鋪路演奸角啫！（恨唔恨攞獎？）係獎都恨攞，不過我會好正面！」

杏兒與Chilam以情侶檔任表演嘉賓。

在劇中與天華（左）爭楊怡的Chilam，與對方拗手瓜。

洪卓立病愈拍劇

而Ken透露在劇中飾演楊怡弟弟：「首次拍二十集嘅劇，心情都幾緊張！（驚身體負荷唔到？）之前抖咗咁耐，都可以試吓拍劇！」另外，杏兒及Chilam前晚出席歌唱比賽，杏兒透露讀書時曾參加歌唱比賽，雖然三甲不入，但奪得「最有潛質獎」。

文：影視組