緋聞男女陳偉霆（William）與Angelababy（Baby），向來不介意以情侶檔搵銀，近日更有報道指二人拍拖斷正，Baby更到William的寓所共度春宵，令戀情更疑幻疑真！未知是否關係升呢，William前晚出席《十人巷黃白大戰》時十分風騷，全晚與周柏豪、鄧紫棋等玩成一片！席間，William為參賽者示範如何推銷牙膏，有人提議他扮Baby的死敵周秀娜（Chrissie），William即接納建議先行一段Catwalk，並以踎低夾胸作結！可能他嫌不夠醜化，再模擬Chrissie在寫真集內的招牌刷牙動作，然後望一望自己心口，明笑對方滴牙膏在胸口，再扮o靚模至愛的嘟嘴表情！

William烏身夾胸，又嘟起小嘴，小心辣慶女模！

放大圖片

曾睇寫真 印象深刻

事後問到扮死敵Chrissie，會否擔心Baby嬲？William笑說：「我覺得佢唔會嬲，因為佢哋唔係競爭對手！事前我唔知考急才，好彩志雲大師（陳志雲）提我扮周秀娜，公司有同事買咗佢本寫真，我有睇過，有啲相好深刻！（夾胸嗰啲？）我唔夠大，咪要夾胸囉！」問到為何不扮Baby？他說：「冇人叫我扮，我都冇扮過佢！（對Chrissie本寫真集嘅印象深過Baby？）Baby都有深刻印象，個景好靚！」問到Baby是否「人不如景」？他即邊嗌救命邊抹汗說：「個人唔錯囉！」

Baby得William力撐，難怪愛得如膠似漆。 資料圖片

周秀娜的刷牙相可謂「招牌之作」，可惜被人抄完又玩，慘不忍睹！ 資料圖片

對於Baby身穿校服拍Online Game廣告，惹起校方不滿，William出言力撐：「我哋冇提過呢個話題，睇報紙先知，好快平息，冇乜特別！（Baby好慘？）唔係好慘，唔係好關佢事，件事係有出錯，係唔啱就唔啱，好彩大家用寬容態度面對，好快平息怒火！」

否認過夜 朋友交流

另外，對於有報道指William與Baby度春宵斷正，英皇娛樂藝人管理部及唱片部總監霍汶希說：「一般朋友交流，做經理人唔會阻止，最緊要唔好影響工作！」至於Baby則說：「嗰日成班朋友睇戲食飯，成班一齊上佢屋企，正常社交活動，只係坐一陣就走！」Baby經理人Kim說：「Baby有自己一班朋友。會唔會避忌？呢啲控制唔到，唔通朋友都避？大家唔好太敏感！」Kim強調Baby並無在William家過夜。