月前辭任東方電影董事局主席的黃百鳴，昨日談到新公司的鴻圖大計：「天馬會以六千萬簽古天樂拍七部戲，當年東方電影三千萬簽甄子丹拍三部戲，成績有目共睹。古仔絕對物超所值，喜劇同劇情片都手到拿來，係個炙手可熱嘅演員。佢參與由《家有囍事2009》班底，加上熊黛林同Angelababy嘅《花田囍事2010》。」

為兒子鋪路

黃百鳴續讚古仔有喜劇細胞，Angelababy形象健康，有潛質做巨星。至於Tony Jaa同甄子丹合作電影的計劃，他說：「初步接觸過Tony，佢有興趣，但要從長計議，睇吓點樣可以一山藏二虎。」

黃百鳴又指開新公司目的為培育兒子當接班人：「其實我仲係東方電影股東，只係退出咗董事局，將來開戲，我樂意幫手。我搞天馬電影、收購天宮沖印廠，都係為咗個仔黃子桓，我希望製作上可以一條龍，初期我會幫佢開山劈石。（培育佢做接班人？）我希望佢青出於藍。」

Angelababy得悉黃百鳴大讚她，即說：「好感謝！我會繼續努力，好期待同吳君如佢哋合作，平時我都好搞笑，有信心應付到。（同緋聞男友陳偉霆都打算喺影壇大展拳腳？）大家係不同嘅個體，各有各發展啦！」而Angelababy經理人Kim則表示，正有日本公司斟Angelababy拍戲。

文：影視組