昨午12時40分，城城由男助手陪同下返港，吸引十多名記者追訪，向來態度合作的他，甫出閘即避開記者，左閃右避。今次專程由泰國返港宣傳電影《阿童木》的城城，晚上即要飛返泰國為新片開工，他先到離境大堂的CX櫃位Check In，問到「是否同Lynn慶祝生日」和「玩得開唔開心」等問題，城城一副型仔樣陰陰嘴笑，卻未有回答。經過一輪擾攘後，城城乘坐保母車直奔荃灣宣傳《阿》片。雖然城城在台上甚為風騷，與四名小朋友玩遊戲，但事先透過電影公司表明，訪問期間不回應私人事。
不斷扯開話題
記者＝記 城城＝城
記：你係咪好開心？
城：我係好開心（心情輕鬆）！
記：尋晚餐飯食得好開心？
城：我唔明你咩意思。（語帶不悅，又借意拉住身旁吳澋滔解圍，問開唔開心。）
記：Lynn……
城：不如問番今日嘅嘢啦！工作以外嘅事唔答，希望大家明白。
記：咁你月底生日有冇假放？
城：到時應該喺泰國，我唔會特別要求放假，做嘢要完全投入，好似今日咁特登飛返嚟好頻撲，因為覺得《阿童木》用咗四百個香港動畫師……（不停轉話題拒談感情事。）
邊走邊講：問我啦
記：有咩生日願望？
城：工作順利啲，拍多啲好嘅電影，媽媽近年身體唔係咁好，我想自己同佢都身體健康。
記：生日願望唔係可以公開講感情咩？
城：工作以外唔答喇！
記：老人家唔想早啲飲新抱茶？
城：呢啲我識得處理。（態度堅決）
記：係咪引咗好多狗仔隊去泰國？
城：係好多傳媒唔知想探班，定有其他嘢要做，暫時都冇影響到我哋嘅拍攝，會唔會封鎖防線就要等電影公司決定。
記：以後都唔講感情事？
城：以後嘅嘢以後先算，我諗今次訪問差唔多……
見記者黑面講Bye
此時，記者不斷問他有關Lynn的問題，以及早前Amanda S.的言論，城城邊轉身離開邊說：「你哋問我啦、問我啦……你哋鍾意點寫就點寫……」
記：咁又唔得喎！
城：我都慣晒啦！
活動後，城城直奔機場飛返泰國，約下午5時45分，他以早上同一打扮抵達機場。心情較早上好的城城，問到是否相當頻撲，他滔滔不絕地說：「係呀！我趕住返去拍戲，我要睇劇本、練對白，我一有時間就睇劇本……」記者即打蛇隨棍上問他是否掛住與Lynn慶祝，所以之前沒有時間睇劇本，他繼續黑面！再問他知否Lynn默認攻城，他亦借聾耳陳隻耳，入閘前向記者講Bye Bye！
採：音樂組 文：專案組