早排「翻版栢芝」貢米來港一遊，話咁易成為焦點，佢仲去過唔少旺區，包括尖沙咀同旺角。有日小小So約咗朋友喺尖沙咀Tea，咁啱遇到貢米同佢口中嘅「比熊爸爸」經理人朱永龍喺度食早餐，好奇心極大嘅小小So即刻行埋去望真啲貢米，果然似栢芝！而貢米亦習慣咗畀人由頭望到落腳，仲見親人都笑笑口好Nice！
打完招呼，朱永龍話要幫貢米化妝，因為等陣間貢米要影相，貢米喺阿龍面前好乖，化妝時粒聲都冇出過，但到正式影相時，攝影師要佢擺日系Cutie嘟嘴甫士時，佢唔識嘟嘴，阿龍忍唔住出手教女，堂堂男子漢擺個嘟嘴Cute樣，佢個嘴一嘟，搞到五官都有啲扭曲，完全唔可愛，但爆笑度十足，貢米見到唔單止嘟唔到嘴，仲笑到收唔到掣，係咁指住佢尊敬嘅「比熊爸爸」係咁笑，阿龍見貢米笑到影唔到相，惟有出絕招用普通話講：「再笑就不給飯你食！」見到「比熊爸爸」堅嬲，貢米先忍住笑擺嘟嘴甫士影相！