環球唱片昨日舉行發布會，譚詠麟（阿倫）率領一眾歌手合唱10首正能量歌曲，旗下歌手將合作出碟之餘，更於12月2日假亞洲博覽館開騷，為香港思覺失調學會籌募經費。碟內歌手大玩Crossover，其中緋聞情侶陳奕迅（Eason）及謝安琪（Kay）更獲安排合唱一曲《青春無晦》，教導年輕人應該正面對待生活，踢走「晦氣」。發布會上，二人原本分開兩邊企，Kay亦不時與劉美君細聲講大聲笑，而Eason則與樂隊Mr.及Swing坐前排，當主持人提到二人合唱的新歌時，Eason主動走近Kay分享歌曲，見他們大方冇避忌，不時微笑互望及咬耳仔，似乎不擔心緋聞再被炒熱。

環球歌手在台上合照，Eason與Kay（箭嘴示）分開企，天各一方。	阿倫（左）踢爆Eason曾因工作出現抑鬱病徵。	心情靚爆的Kay，拉着張敬軒傾偈。

曾有抑鬱 阿倫開解

發布會後，問到有否出現思覺失調的病徵，Eason說：「應該冇！我同阿倫都鍾意講嘢，將內心嘅抑鬱散發出嚟！」其後阿倫踢爆Eason曾遇事業困難，一度出現抑鬱病徵：「當年佢未係好紅，我見到佢，覺得佢有少少抑鬱，可能工作太多，有啲Upset，佢助手叫我開解吓！」Eason大讚阿倫是個好聆聽者，與他交談獲益良多，希望跟對方一樣保持「玩」的格言，寓工作於娛樂。