親情篇

賭王何鴻燊與四太梁安琪的長女何超盈，予人印象是愛蒲愛玩。今年暑假，兩個男人令她霎時改變，一個是跌傷入院的父親，一個是她的男友Greg。

今年八月，賭王因撞傷頭部而入院，超盈得悉後立時由澳門飛奔返港。當抵達醫院時，賭王已推進手術室，超盈只能乾着急，在醫院度過人生最漫長的一天，她說：「當時好驚仲忍唔住喊，以前從來冇發生過呢種事，係我咁大個女最驚、最緊張嘅一次，直到爹哋做完手術出嚟先鬆一口氣。」原定暑假後返英升讀大學的超盈，因父親入院而毅然決定留港讀書，以實際行動支持雙親，她說：「係媽咪提議我留低，其實佢一開口，我已經OK，男友都好支持我呢個決定。留低主要係支持媽咪，而且爹哋康復後都好需要屋企人陪伴同做物理治療。」今次決定，對超盈來說可謂犧牲不少，需重新適應讀書環境及傳媒，但豁達的她有信心面對一切。

賭王入院後，四房紛爭的報道偶有傳出，外界無不以為四房關係錯綜複雜，但實情是相處和睦，超盈說：「我哋好開心！無論邊房嘅家姐同媽咪都好融洽，冇你哋講嗰種鬥同比較，可能冇人會信，但我哋真係好正常嘅家庭生活。」雖然擁有非一般的父親，但她表示一家人如常人般一起食飯，還會鬥嘴：「我哋每星期都會食幾次飯，全家會一齊睇網球比賽，因為大家都鍾意，但又捧唔同球星，所以成日鬥嘴！」早前超盈愛上烹飪，還親自下廚炮製了幾道家常菜給家人，她說：「我煮咗蒸魚、炒菜同埋爹哋最鍾意嘅蛋白蝦仁炒粉絲，聽落好易，但對我嚟講幾難，係我第一次煮，細佬仲整蠱我叫爹哋唔好食，因住肚痛，但爹哋梗係話好食。」超盈娓娓道出家庭趣事，尋常得令人難以想像。

父母係Best Friend

賭王曾自稱家中是慈父嚴母，但實情是父慈母不嚴，超盈笑言父母也從未真正鬧過她：「我對佢哋好尊重，唔使爹哋開聲鬧，只要佢皺皺眉，自己就會改，爹哋咁多年都冇鬧過我。媽咪都冇，佢只會用搞笑嘅形式同我講，佢可以話係我另一個Best Friend。」就算家規也只有簡單兩條，就是不可隨便帶陌生男子回家及要返足學。

愛情篇

突然由「反叛女兒」轉變為「乖乖女」，超盈直指歸功於拍拖半年的Greg。她表示兩人在英國認識，第一次見面是在朋友家的飯局。Greg當時已知超盈的身份，曾留意有關她的負面報道，對她甚為抗拒，反而超盈對他的第一個印象是「好斯文、好靜，跟自己不同」，她說：「佢係一個好Simple嘅人，佢以為我係嗰種千金小姐，後來熟咗先發現原來唔係。」由起初抗拒到變成情侶，紅娘竟然是一隻小狗：「因為朋友屋企有養狗，我同佢都好鍾意狗，大家一齊玩狗，就係咁開始傾偈。」

超盈欣賞Greg有上進心、細心及愛屋及烏，但最感動的還是對她的一片真心，她直言曾經歷過不愉快的拍拖經驗：「因為我嘅身份，好難搵到一個鍾意我多過鍾意我屋企嘅錢或者名譽嘅人，好難有個一個真心嘅男朋友。」

學懂關愛別人

超盈認為Greg影響她最大的是性格，形容以前的自己幼稚，凡事只會考慮自己，但現在開始顧及他人感受：「佢真係攞個心嚟對我、關心我，我有時會出街出到好夜，我會好內疚，佢係我男友都咁關心我，何況我屋企人？」拍拖後變成熟的超盈承認，以往一度很反叛，為的是激媽咪：「依家我已經玩夠，我知18歲話玩厭係好怪，我唔係話我唔會出去玩，但我會同男友出去，但唔會好似以前咁玩天光。」

友情篇

在各房兄弟姊妹中，超盈與三房的超雲最為老友，經常相約食飯Shopping：「我同超雲年紀差不多，大家都鍾意行街買嘢。超蓮同我細佬夾啲，佢經常會同我講邊個台灣明星啲歌好聽，Send段鈴聲畀我。」雖然外界愛把她與超雲作比較，但超盈完全不介意，縱使連賭王也批評「麻麻哋」，超盈亦沒有介懷：「我真係冇佢哋咁靚！我啲家姐都好靚，比落去我唔夠好，可能我之前比較肥。」

帶眼識人自保

身為名人第二代難免成為傳媒焦點，曾經被指爛玩愛蒲的超盈認為，外界有時以偏概全，將她與她的朋友混為一談：「我唔係經常夜蒲，但有幾個人晚晚喺蘭桂坊，外面嘅人就會諗『佢喺度，我都一定喺度！』可能一個人做錯事，就睇成全部人都一樣。」對於昔日的朋友唐貝詩，超盈表示不願多談，因大家性格不同已有半年不見。她還坦承小時候容易信人，經常被朋友搵着數，但現時學懂帶眼識人：「依家大部分朋友喺英國讀書，思想比較西化，食飯大家未必會AA制，但至少會每人請一餐。」

後記

提起早前超雲曾在訪問中稱母親（三太）指示見過報的衣服不能再着，問到超盈是否如此？她笑說：「唔會！我同媽咪着同一個Size，大家經常一齊買衫。好似今日呢件衫，前幾日已經見過報。」

文：名人組