快將44歲的天王郭富城，戀情多姿多采，早前被指撇甩Lynn而搭上王秀琳（Mango），城城「偷杧」事件令「富黛戀」現暗湧。有傳Lynn在上海拍攝電影《葉問2》時，疑備受失戀打擊玩自閉，兼只以杯麵充飢，更有指她自殘，Lynn還被發現進出當地醫院急症室。但其經理人Kim否認傳聞：「唔使理呢啲報道，個報道係作料，Lynn喺上海拍緊戲，雖然佢有腸胃炎，但佢係唔會傷害自己嘅人。」

Lynn否認因受情困而自殘身體。 資料圖片

城城和熊黛林因合作MV而撻着。 資料圖片

祝早日搵更高男友

曾是城城前緋聞女友的名模Amanda S.，昨日聯同樂基兒、Cara G.和Jocelyn，擔任Aigle秋冬時裝騷的模特兒。有指Lynn情困自殘，Amanda寄予同情之餘，言談間還不禁寸爆城城的高度，她話中帶刺地說：「佢（Lynn）應該正面啲，佢咁靚女同叻女，一定可以搵到個好好同好『高』嘅男朋友，最緊要愛惜自己。」問到會否覺得城城是花心一族？Amanda再發功嘲諷城城未定性，暗指他花心：「佢呢個年紀都唔結婚，即係佢仲未想穩定，又或者佢覺得依家呢個，唔係佢嘅Mrs. Right，所以繼續約會其他女仔。」問到若男友一腳踏兩船，會有何感覺時？Amanda笑說：「我會覺得好Hurt，但我相信自己可以搵到個更好。」

此外，城城將於明天啟程赴曼谷，為彭順執導的新片《B+偵探》（暫名）試戲和試造型。因年前的《C+偵探》票房和口碑不俗，故原班人馬拉隊拍攝，城城再以剷青椰殼Look拍攝，即使Lynn本月十日生日，他仍要留在曼谷開工。

Cara G.（左）和Jocelyn擔任秋冬時裝騷的模特兒。	因王秀琳的出現，令「富黛戀」現暗湧。 資料圖片	SoSo姐金句：名模姊妹同聲同氣，幫口潤城城出氣。