06/10/2009

播放本新聞相關短片

吳彥祖失言貽笑大方

喺美國「土生土長」嘅吳彥祖(Daniel),雖然近幾年已經成功攞到香港永久身份證,不過呢個「香港人」講廣東話,依然係笑料百出!日前佢出席一個慈善活動,畀人問到點解願意為主辦機構出心又出力,佢竟然操唔鹹唔淡嘅廣東話,衝口而出話:「因為經過四川嗰單嘢……」台下當場呆晒,大家你眼望我眼,有人隔咗一陣仲忍唔住失笑添!

事後小小So同Daniel講番當時嘅情形,問佢點解會「失言」,Daniel竟然懵懵吓話:「咁講有乜問題?」小小So向佢解釋:「因為『嗰單嘢』呢個用詞,好似唔係咁尊重個場合囉!」Daniel說:「哦!我真係唔知道,應該點講先啱?」連小小So都未嚟得切反應答佢,Daniel突然又「如夢初醒」問小小So:「係咪應該話『嗰件事』,或者用乜乜事件嚟形容呢?原來『嗰單嘢』係粗話,哈哈!」雖然「唔識講嘢」,又經常畀人笑講廣東話好似講緊英文咁,不過Daniel真係善心爆棚,仲計劃嚟緊同女友一齊去四川探吓上次探訪時識落嘅小朋友。