蔡卓妍（阿Sa）前晚出席時裝活動時自爆，日前在家中休克暈倒，撞到頭更一度反白眼：「因為我感冒，啲藥又好勁，醒嗰陣成身標冷汗，個心口紅晒，因為媽咪係咁拍醒我……大約暈咗幾十秒！」但她未有急Call救護車，因為暈倒已是家常便飯：「醫生話係Panic Attack（驚恐症），因為個人緊張！我細個一考試就暈，但Body Check冇事！可能係我冇休息，加上病咗個幾星期！」她試過在街頭及表演後暈倒，由於沒有先兆，只能帶藥傍身。
阿Sa坦言暈倒時想過退隱：「阿媽以為我會死，我可能會同公司講『退役』一陣，休息1年，但我仲有4套戲，排到好遠！我唔想睇，睇到我又暈！尋晚覺得身體好重要，錢係搵唔晒，最重要係身體，怕老咗要喺病床過。」
拒絕鄭中基養
問到鄭中基有否擔心？阿Sa不欲多談：「OK啦！（有冇打畀你？）OK啦！（打畀佢求救？）冇求救，個個都好擔心！」她揚言未有嫁人打算，假若真的休息1年，她會吸取其他生活經驗，更不擔心財政出現問題，問到會否等緋聞男友鄭中基養？她說︰「女人唔可以靠人養！」
拍戲唱歌冇得抖
阿Sa自小多病，經常突然暈倒，難怪一直想放假休養身體，但因工作太忙，至今已落實拍攝8個廣告，期間更要宣傳電影《風雲》（右圖）及台劇《呼叫大明星》，稍後開拍王晶執導的《美麗密令》及爾冬陞執導的《鎗王之王》等4部電影。唱歌方面，阿Sa下月將推出新廣東專輯，同時要為國語專輯錄音，趕於明年1月面世。
何謂Panic Attack？
阿Sa突然暈倒，勞永樂醫生解釋「Panic Attack」即是驚恐症：「驚恐症係一種心理病，病人遇到某個處境或物件，就會出現非理性驚慌，程度高低會引致不同反應，例如心跳加速、出汗、手軟，甚至暈低！好難解釋病因，但好多時候係同病人細個畀某樣嘢嚇親有關。」他指出3種方法治療驚恐症：「第一係藥物治療，服食鎮靜藥物減低驚恐反應。第二係心理治療，透過心理分析去搵出問題。第三係行為治療，訓練病人逐步面對驚恐嘅事。」
採：名人組 文：專案組